”انسانی گوشت بہت مزیدار ہوتا ہے، بس اوپری جلدی تھوڑی کڑوی ہوتی ہے باقی کا گوشت بہت مزیدار ہوتا ہے۔ “ جنگلی قبیلے کی عورت کیمرے کی طرف دیکھتے ہوئے بولی ”جب بھی ہمارا کوئی عزیز مرتا ہے تو اس کے قریبی رشتہ دار اس کی لاش کو پکا کر کھاتے ہیں، خاندان کی سب سے بڑی عورت اس لاش کو پکاتی ہے۔ لاش کے ہاتھ بہو کو کھلائے جاتے ہیں اور یہ اس کے لئے قابل فخر بات ہوتی ہے۔ “یہ الفاظ پاپوانیوگینیا کے ایک جنگجو قبیلے کے افراد کے تھے جو کہ آدم خور بھی تھے۔ سب کچھ روٹین کے مطابق چل رہا تھا۔ آدم خوری بھی اور زندگی کاسفر بھی، لیکن پھر ایک نامعلوم بیماری سامنے آگئی۔ یہ بیماری انتہائی عجیب تھی اس میں پہلے مریض کے سر میں درد ہوتا، یوں لگتا کہ بخار ہورہا ہے مگر پھر اس مریض کا جسم کانپنا شروع ہوجاتا اور وہ مریض لڑکھڑانے لگ جاتا، اور آخر میں مکمل بے جان ہوجاتا۔ چونکہ دور دراز علاقے کے لوگ تھے سو توہم پرست بھی تھے۔