نئے سال کے لیے یہ دعا کیسی ہے؟
یہ بات بہت پرانی نہیں ہے۔ شاید صرف ایک نسل پہلے کا ذکر ہے جب گھر کا ایک خاص تصور ہوتا تھا۔ گھر کے تصور کی بنیادی خصوصیات میں تحفظ، اپنائیت، محبت، آپس کی عزت اور آزادی وغیرہ شامل تھے۔ ان سب اجزائے ترکیبی کے باعث گھر سکون اور سیلف رسپیکٹ کی علامت تھا۔ ان جذبات کے بغیر اگر کچھ لوگ ایک چھت تلے رہ بھی رہے ہوتے تو وہ گھر کے حقیقی تصور سے دور ہوتے تھے۔ اس لیے اسے گھر کی بجائے مکان کہا گیا۔ مکان کو گھر بنانے کی خواہش لے کر ہندوستان کے مسلمانوں نے ایک کونے میں زمین حاصل کی اور اس کٹی پھٹی جگہ پر لٹے پٹے انسانوں نے مل کر اپنے گھر پاکستان کی تعمیر کا ارادہ کیا۔
1947 ء سے لے کر 2022 ء کے آغاز تک تقریباً 74 برسوں سے زائد عرصے میں انفرادی اور اجتماعی طور پر پاکستانیوں پر اپنے گھر میں کیا کیا بیتی اس کا مطالعہ کریں تو تاریخ کے صفحات آنسوؤں میں بھیگے نظر آتے ہیں۔ سب سے پہلے یہاں کی خارجہ پالیسی آسیب زدہ ہو گئی۔ اسی کے نتیجے میں گھر کے سربراہ وزیراعظم لیاقت علی خان کو گولی مار دی گئی۔ اس کے بعد اس گھر کے ڈرائنگ روم میں اپنے ہی گھر والوں کے خلاف جوڑ توڑ اور محلاتی سازشوں کا آغاز ہو گیا۔
جب کسی نے اس گھر میں عزت مانگی یا اپنی مرضی سے رہنے کی خودمختاری چاہی تو اسے غدار کہا گیا۔ یوں سب سے پہلے بنگالی اس گھر میں اجنبی ہو گئے۔ گھر کے اندر اجنبیت کا سلسلہ پھر بھی رکا نہیں یوں ہی چلتا رہا۔ 1973 ء میں آئین پر سب نے دستخط کر دیے مگر آپس میں اتفاق سے نہ رہ سکے۔ ایک ہی مذہب کے کئی خانے بنا دیے گئے۔ بڑے اور چھوٹے صوبوں کے درمیان ایک دوسرے کا حق مارنے کی شکایتیں پیدا ہوئیں۔ یہ سب کچھ ایک ہی گھر کے اندر ہوتا رہا۔
صدی بدلی تو نفرت اور دشمنی کے رویے بھی بدل گئے۔ دوسرے کو گولی سے مارنے کی بجائے بم سے مارا جانے لگا۔ دین کے نام پر اپنوں کے پرخچے اڑائے جانے لگے۔ سیاست میں مخالفین کو ووٹ کی بجائے خودکش حملے کے ذریعے ختم کیا جانے لگا۔ نوبت یہاں تک پہنچ گئی کہ اس پاک گھر پاکستان میں بسنے والے ایک دوسرے کو کسی حد تک قبول کر رہے ہیں اور نہ ہی ایک دوسرے کے ہاتھوں ان کی جان، مال اور عزت محفوظ ہے۔ اس بڑے گھر کی تہذیبی توڑ پھوڑ کے بعد اگر ہم انفرادی گھروں کا جائزہ لیں تو وہاں بھی پہلے والی خیر نہیں ملتی۔
مثلاً بچے کسی بھی گھر کا سب سے معصوم اور خوبصورت حصہ ہوتے ہیں۔ ان کے چہروں سے بے فکری اور مستقبل کی امید کا نور جھلکتا ہے لیکن اب معاشرتی تناؤ، گھریلو لڑائی جھگڑوں اور ماں باپ کی خواہش پر مقابلے کی دوڑ کی بھینٹ چڑھے ہوئے یہ بچے پھول کلیوں کی طرح کھلے ہوئے نہیں ہوتے۔ آپ بیشتر بچوں کو غور سے دیکھئے۔ ان کے چہرے پچاس سال قبل کے بچوں کی طرح دھلی ہوئی صبح کی مانند شفاف نہیں ہوں گے بلکہ معصومیت، بے فکری اور مسکراہٹ کی بجائے ان ننھے فرشتوں کی شکلوں پر سنجیدگی، فکر اور غصہ نظر آئے گا۔
میاں بیوی کو لیجیے۔ پہلے دونوں میں احترام کا رشتہ ہوتا تھا پھر اسے محبت کا نام دیا گیا۔ آہستہ آہستہ دونوں کے بینک اکاؤنٹ تو الگ ہوئے ہی ذاتی معاملات بھی علیحدہ علیحدہ ہو گئے۔ اب دونوں کی اپنی اپنی پرائیویسی ہے۔ آگے چلئے۔ خاتون گھر کا مرکزی کردار ہوتی تھی۔ پہلے اس کا دھیما پن، صبر و شکر کی عادت اور نرم مزاجی گھر کو جنت بنائے رکھتی تھی۔ یہی خاتون غصے کے جذبے سے ناواقف تھی لیکن یہ سب کچھ اب اکثر اوقات گھر کی بجائے گھر سے باہر نظر آتا ہے۔
دوسروں سے ملتے ہوئے، تقریبات میں شامل ہوتے ہوئے یا کام کی جگہ پر اپنے کولیگز سے میل ملاقات کرتے ہوئے عموماً بیشتر خواتین بہت خوش مزاج نظر آتی ہیں۔ ان کے چہرے پر مسکراہٹ پھیلی ہوتی ہے۔ نرم گفتاری اور دھیمے پن کا شاندار مظاہرہ کیا جا رہا ہوتا ہے لیکن جونہی یہی خواتین اپنے گھروں میں داخل ہوتی ہیں تو ان پر جھنجھلاہٹ طاری ہو جاتی ہے۔ نرمی اور دھیمے پن کی جگہ غصہ لے لیتا ہے۔ گھر سے باہر اپنے آپ کو بالکل فٹ ظاہر کرنے والی خواتین جب تک گھر میں رہتی ہیں تھکی تھکی رہتی ہیں۔
اسی طرح پہلے مرد گھر کے تحفظ، معاشی ضروریات اور مضبوطی کی علامت ہوتے تھے۔ اس کی بردباری اور زیرکفالت کنبے سے شفقت، اس کے احترام کا باعث ہوتی تھی۔ انہی کے سبب وہ گھر کا سربراہ کہلاتا تھا مگر اب اکثر مرد اپنے گھر میں موجود لوگوں کو اپنی رعایا تصور کرتے ہیں۔ گھر میں دھاڑتے اور غصے سے آگ بگولہ رہنا اکثر مردوں کی مردانگی ہے جبکہ گھر میں یہی ناقابل تسخیر مرد باہر کی دنیا میں بے حد ملنسار، صاحب متانت اور ٹھنڈے مزاج کے ہوتے ہیں۔
اپنے گھر کی خواتین اور بچوں کے سامنے آگ اگلتے ہوئے یہ توپ خانے جب باہر کسی صنف نازک سے ملتے ہیں تو گل و گلزار ہوتے ہیں۔ مونچھوں کے نیچے ہنستے دانت دیکھ کر کوئی نہیں کہہ سکتا کہ یہ صاحب گھر کی دہلیز میں داخل ہوتے ہی سڑیل پن کا عالمی ایوارڈ حاصل کر سکتے ہیں۔ گھر کے بیشتر سربراہ جو گھر سے باہر بے حد مہذب اور انسانی حقوق کے علمبردار ہوتے ہیں گھر میں بھٹہ مالکان کی طرح رہتے ہیں۔ تہذیبی تبدیلیاں ہمیشہ سے ہوتی آئی ہیں اور یہ ضروری بھی تھیں۔
تب ہی ایک جدید اور مہذب معاشرے کا قیام ممکن ہوسکا ورنہ حضرت انسان اب بھی پرانے انسانوں کی طرح پتوں سے جسم ڈھانپتا، درختوں اور غاروں میں رہتا لیکن ہمارے ہاں تہذیبی تبدیلی کے نام پر کچھ اور ہی ہوا ہے جس کی وجہ سے باہمی اعتماد، رحم دلی اور امن جاتا رہا ہے۔ آج بچوں کے پاس شعور، علم اور جدید ٹیکنالوجی موجود ہے مگر ان کے چہروں پر تازگی کی بجائے صدیوں کی مسافت کے اثرات نمایاں ہیں۔ آج میاں بیوی دو پہیے تو ضرور ہیں مگر ایک ہی گاڑی کے نہیں بلکہ ساتھ ساتھ کھڑی دو علیحدہ علیحدہ گاڑیوں کے ہیں۔
آج خاتون پہلے سے زیادہ با اختیار، آزاد، باشعور، تعلیم یافتہ اور صحت مند ہے مگر گھر کی جنت کی صحت خراب ہو چکی ہے۔ آج مرد اپنے ہی گھر میں ایک حملہ آور فاتح کی طرح رہتا ہے۔ ان سب حالات کو دیکھ کر کہا جاسکتا ہے کہ ہم سب گھروں کی بجائے مکانوں میں رہتے ہیں۔ ہم نے 2022 ء کے آغاز میں بہت سی دعائیں مانگی ہوں گی لیکن نئے سال کے لیے یہ دعا کیسی ہے؟
مرے خدا مجھے اتنا تو معتبر کردے
میں جس مکان میں رہتا ہوں اس کو گھر کردے
- سیاسی جماعتوں کے منشور میں خصوصی افراد کا حصہ - 09/02/2024
- ایدھی صاحب کی برسی پر چند باتیں - 12/07/2023
- اقبال خلیل۔ وہ باتیں تری وہ فسانے ترے - 16/04/2023
Facebook Comments - Accept Cookies to Enable FB Comments (See Footer).