کمسن اسکالر، ادیب، شاعر اور کتب بینی کی دنیا کا ہیرو، سید عباس رضا زیدی
چھٹی جماعت کا طالب علم گیارہ سالہ عباس لگ بھگ دو ہزار کتب کی ورق گردانی کر چکا ہے۔ علمی و ادبی گھرانے کے چشم و چراغ، نسل در نسل لاجواب آئیے آج ہم آپ کو برطانیہ میں مقیم پاکستان سے تعلق رکھنے والے ایک علمی و ادبی خانوادے کے کمسن اسکالر سے متعارف کرواتے ہیں۔
اس بین الاقوامی شہرت کے حامل نو عمر ہیرو بلکہ کمسن اسکالر سید عباس رضا زیدی کا تعارف کروانے سے قبل ہم بہتر سمجھتے ہیں کہ ان کے خاندانی پس منظر پر ایک سر سری سی نظر ڈال لیں۔
محسنین ملک و ملت کے خاندانوں کے مشترکہ اور فخریہ شاہکار فرزند جناب سید عباس رضا زیدی کے پر نانا تحریک پاکستان کے سرگرم کارکن، اردو و فارسی زبان و ادب کے خاموش خدمت گار اور ریڈیو پاکستان سے آواز کے دوش پر دنیا بھر کو مطلع فرمانے والے کہ پاکستان معرض وجود میں آ چکا ہے اور یہ ریڈیو پاکستان ہے جی ہاں ہماری مراد ہے جناب سیدی سرکار سید مصطفی علی ہمدانی صاحب سے کہ جنہیں براڈکاسٹنگ کی دنیا کا مہاراج مانا گیا اور ان کے نام اور کام مقام اور خدمات کا بین الاقوامی سطح پر اعتراف کیا گیا۔ ان کے حقیقی، علمی و ادبی وارث جناب سید صفدر ہمدانی صاحب کو ریڈیو اور براڈ کاسٹنگ کا ہی نہیں بلکہ شعبۂ صحافت، ادب اور صداکاری کا بے تاج بادشاہ قرار دیا گیا ہے۔ شعرائے اہل بیت اطہار کی فہرست میں بھی ان کا اسم مبارک اہم اور نمایاں نظر آتا ہے۔
کمسن اسکالر سید عباس رضا زیدی کے بارے میں بتاتے چلیں کہ وہ سید ندیم رضا زیدی کے فرزند ہیں جبکہ ان کی والدہ محترمہ زہرا صفدر زیدی صاحبہ جناب صفدر ہمدانی اور محترمہ ماہ پارہ صفدر کی دختر نیک اختر ہیں۔ محترمہ ماہ پارہ صفدر صاحبہ پاکستان ٹیلی وژن کی نامور، مقبول اور ہر دلعزیز نیوز کاسٹر رہی ہیں۔ بعد ازاں بی بی سی اردو سے وابستہ ہو گئیں اور پاکستان سے انگلینڈ منتقل ہو گئیں۔ انہیں ایک ممتاز سیاسی، ادبی اور سماجی تجزیہ کار اور کی حیثیت سے بھی جانا اور مانا جاتا ہے۔
بحیثیت شاعرہ، ادیبہ اور کالم نگار بھی انہیں نیک نامیاں حاصل ہوئیں۔ ان کا یو ٹیوب چینل بھی مقبول ترین چینلز میں شمار کیا جاتا ہے۔ محترمہ ماہ پارہ صفدر کی خود نوشت میرا زمانہ، میری کہانی، حال ہی میں بک کارنر، جہلم کے توسط سے منظر عام پر آئی ہے بلکہ آتے ہی دھوم مچا چکی ہے۔ محترمہ ماہ پارہ زیدی کے والد گرامی سید حسن عباس زیدی انتہائی زیرک انسان تھے۔ ان کا شمار سرگودھا کی ممتاز علمی و ادبی شخصیات میں کیا جاتا رہا ہے۔
پروفیسر ڈاکٹر خورشید رضوی، پروفیسر غلام جیلانی اصغر، ڈاکٹر انور سدید، پرویز بزمی اور عبدالرشید اشک جیسے متعدد صاحبان علم و بصیرت دوستانہ مراسم کے باوجود بھی سید حسن عباس زیدی کا حد درجہ احترام کیا کرتے تھے۔ جبکہ بیگم سید حسن عباس رضا صاحبہ بھی حد درجہ زیرک خاتون تھیں۔ گھریلو خواتین میں اس جیسی فہم و فراست کم کم ہی دیکھنے کو ملتی ہے کہ جیسی ان میں دکھائی دیتی تھی۔
سید عباس رضا زیدی کل تین بہن بھائی ہیں اور انہیں ولی عہد ہونے کا بھی اعزاز حاصل ہے۔ ان کا ایک چھوٹا بھائی سید حسنین رضا زیدی ہیں جبکہ ان کی چھوٹی بہن کا نام۔ زینہ زیدی ہیں۔ عباس زیدی پرائمری اسکول سے فارغ التحصیل ہو کر چھٹی جماعت میں داخلہ لے کر اپنی مرضی اور پسند کے گرائمر ہائی اسکول سے وابستہ ہوئے ہیں۔
سید عباس رضا زیدی تحریر و تقریر کے مقابلوں میں بھی بڑھ چڑھ کر حصہ لیتے ہیں اور ان مقابلوں میں نمایاں کامیابیاں حاصل کرتے ہیں۔ کتب بینی کا شوق اور جنون انہیں ورثے میں ملا۔ گلوبل وارمنگ کے شعبے میں پیشہ ورانہ مہارت حاصل کرنے کے متمنی ہیں۔ پاکستان اور پاکستانیت ان کے زمانہ میں شامل ہے۔ جب کبھی پاکستان کا کسی بھی دوسرے ملک سے کوئی میچ ہوتا ہے تو ان کی دعائیں اور نیک تمنائیں پاکستان کی ٹیم کے ساتھ ہوتی ہیں۔ سید عباس رضا زیدی جذبۂ حب الوطنی سے سرشار ایک سچے اور کھرے پاکستانی ہیں۔ لگ بھگ دو ہزار کتب کا مطالعہ کرنے والے عباس کا کہنا ہے کہ انہیں کتب میں تاریخ، فکشن اور دیگر موضوعات پسند ہیں۔ ان سے گفتگو کر کے ان کے حیرت انگیز پر عزم اور پر اعتماد ہونے کا اندازہ کیا جاسکتا ہے۔
ضرورت اس امر کی ہے کہ سید عباس رضا زیدی جیسے بچوں کی جس قدر ممکن ہو سکے حوصلہ افزائی کی جائے اور ان کے ہم عمر بچوں کے سامنے ان کی مثال پیش کی جائے۔ مثبت رجحانات اور رویے اتنی آسانی سے نہیں پنپا کرتے۔
کمسن اسکالر، ادیب، شاعر اور کتب بینی کی دنیا کا ہیرو = سید عباس رضا زیدی
- استاذالاساتذہ پروفیسر ڈاکٹر خواجہ محمد زکریا - 24/03/2024
- صدیقہ بیگم پاکستانی اور صدیقہ بیگم ہندوستانی ( 1 ) - 09/12/2023
- ڈاکٹر توصیف تبسم : ایک روشن چراغ تھا، نہ رہا - 07/10/2023
Facebook Comments - Accept Cookies to Enable FB Comments (See Footer).