زمانہ طالب علمی کے چھ سال پنجاب میں گزارے۔ اس دوران لاہور کو روز ترقی کرتے دیکھا۔ میٹرو بس پروجیکٹ، شہر میں بڑےفلائی اوورز، انڈر پاس اور بہت سے میگا تعمیراتی و ترقیاتی منصوبوں کو مکمل ہوتے اور لاہور کے انفراسٹرکچر میں نمایاں تبدیلی آتے دیکھی۔ اس وقت لاہور سے کراچی اور کراچی سے تربت بذریعہ بس یا گاڑی سفر کرتا تھا تو دوران سفر پنجاب، سندھ اور بلوچستان کے مختلف شہروں سے گزرتا تھا۔ شہروں کی خوبصورتی، کلچر، طرز زندگی، حکمرانوں کی کارکردگی اور عوام کے حالت زار کو قریب سے دیکھنے کا موقع ملتا تھا۔ اس دوران پنجاب کو ترقی کرتے ہوئے دیکھا مگر بلوچستان کو سیاسی سماجی معاشی بلکہ ہر لحاظ سے زوال پذیر ہوتے دیکھا۔ لاہور سے جب تربت پہنچتا تھا تو شہر کی خستہ حال سڑکیں، ٹوٹی پھوٹی انفراسٹرکچر اور بے ترتیب سیوریج دیکھ کر یہ محسوس ہوتا تھا کہ وقت ایک صدی پیچھے چلا گیا ہے۔