میں بھی اس لائن میں کھڑا ہو کر اپنی باری کا انتظار کرنے لگا۔ مجھ سے پہلے جو لڑکے بال کٹوا کر نکل رہے تھے، ان کی حالت دیدنی تھی۔ ہر لڑکا جب تک نیوی کے حجام کے پاس تک نہیں پہنچا تھا بہت خوش تھا لیکن جیسے ہی حجام کی شاپ سے باہر آتے ، شیشے میں چہرہ دیکھ کر آتے اور اپنے منہ کو چھپاتے پھرتے۔ کئی بے چارے تو رو پڑے اور کئی لڑکوں کی آنکھیں نم تھیں۔ اس کی وجہ حجام نے جو سر کے بالوں اور مونچھوں کا حال کیا تھا، یہ دیکھ کر ہر لڑکا پریشان ہوا۔

ایک ہئیر کٹ فوجی کہلاتا ہے۔ یہاں تو فوجی کٹ سے بڑھ کر رنگروٹ کٹ تھا۔ سر کے اوپر تھوڑے سے بال چھوڑ کر باقی تمام بال صاف اور مونچھیں تو ایسے غائب کہ جیسے گدھے کے سر سے سینگ۔ اس طرح کے اسٹائل کی ہیئر کٹنگ کے بعد ہر لڑکے کا چہرہ ضرور لٹک گیا۔ دو گھنٹے انتظار کرنے کے بعد باری آئی تو میں بھی ان لڑکوں میں شامل ہو گیا جو بال کٹنے کے بعد روئے۔