کون بدن سے آگے دیکھے عورت کو
پاکستان میں جرائم کی بڑھتی فہرست میں عصمت دری کے واقعات کی تعداد میں نمایاں اضافہ ہوا ہے۔ جنسی جرائم کے رپورٹ شدہ اور غیر رپورٹ شدہ واقعات کی ایک تشویشناک تعداد ہے جس کو ہیومن رائٹس کمیشن آف پاکستان کی حالیہ رپورٹ میں پیش کیا گیا ہے۔ ہیومن رائٹس کمیشن کے مطابق گزشتہ چھ سالوں میں ریپ کے 22,000 سے زائد کیسز رپورٹ ہوئے ہیں۔ پاکستان میں حدود آرڈیننس ( 1979 ء) عصمت دری کو جرم کے طور پر تسلیم کرنے والا پہلا قانون تھا اور بعد میں بھی اس حوالے سے قوانین تیار ہوتے رہے۔
گزشتہ برس ہی حکومت پاکستان نے مشتعل حالات سے نمٹنے کے لیے مروجہ قوانین میں پائے جانے والے سقم کو دیکھتے ہوئے، انسداد عصمت دری (تحقیقات اور مقدمے کی سماعت) ایکٹ 2021 ءنافذ کیا ہے جس نے ملک میں پہلے سے منتشر عصمت دری کے قوانین کو مضبوط کیا ہے۔ اگرچہ عصمت دری کے متاثرین کے ازالے کے لیے اب تک کی سب سے بہترین کوشش ہے لیکن بدقسمتی سے یہ ایکٹ نہ صرف عمل نفاذ میں خامیوں سے بھرا ہوا ہے بلکہ اس پر عمل درآمد میں بھی بڑی مشکلات کا سامنا ہے۔
پہلے سے الجھاؤ کا شکار پولیس اور پراسیکیوشن محکموں کی تربیت کا فقدان، انسداد عصمت دری کرائسس سیلARCCs) ) کے قیام اور متاثرین کی مدد کے لیے ابھی تک خصوصی تفتیشی افسران اور مشترکہ تحقیقاتی ٹیموں کی تشکیل کا کوئی نام و نشان نہیں ہے۔ ایکٹ کو نافذ کرنے کے لیے درکار وسائل کی شدید کمی، موجودہ قانونی ڈھانچے کی تعمیر کے بجائے متعدد فورمز کی تشکیل اور ایکٹ میں جنسی ہراسانی کا کوئی ذکر نہیں ہے۔
2021 ءسے پہلے انسداد عصمت دری کے قوانین پر نظر ڈالیں تو ہمیں دور تک دھندلا پن نظر آتا ہے۔ 1947 ءکے بعد سے خواتین کو مختلف کثیر جہتی مسائل کا سامنا تھا۔ تاہم جنسی جرائم ان سب میں سے ایک اہم مسئلہ تھا۔ اس کے بارے میں 1979 ءمیں ملک میں اس وقت کے چیف ایگزیکٹو اور مارشل لاء ایڈمنسٹریٹر جنرل ضیاء الحق نے حدود آرڈیننس لاگو کر کے زنا اور زنا کے نئے جرائم میں اضافہ کیا۔ کیوں کہ جنرل ضیاء الحق کی ”اسلامائزیشن“ مہم کا حصہ ہونے کے ناتے، حدود آرڈیننس کا مقصد شرعی قانون کو نافذ کرنا تھا تاکہ نہ صرف برطانوی دور کے PPC کے حصوں کو تبدیل کیا جا سکے بلکہ پاکستانی قانون کو بھی ”اسلام کے احکام کے مطابق“ لایا جا سکے۔
زنا (غیر ازدواجی جنسی تعلقات) ، قذف (زنا کا جھوٹا الزام) ، چوری اور شراب نوشی کے لیے قرآن و سنت میں مذکورہ سزاؤں کو نافذ کیا گیا۔ ان کوششوں کو اس وقت کافی تنقید کا سامنا کرنا پڑا کیونکہ حدود آرڈیننس نے عصمت دری کے الزام کو ثابت کرنا غیر معمولی طور پر مشکل بنا دیا تھا۔ حدود آرڈیننس کے مطابق متاثرہ خاتون کو عصمت دری کے جرم کو ثابت کرنے کے لیے چار بالغ اور مرد چشم دید گواہ پیش کرنے کی ضرورت تھی اور ایسا نہ کرنے کی صورت میں اسے زیادتی کے جھوٹے الزام میں جیل بھیجنا تھا۔ حدود آرڈیننس زنا اور عصمت دری کے درمیان فرق کرنے میں ناکام رہے، اور خواتین کو ”بے گناہ ثابت ہونے تک مجرم“ کے طور پر پیش کیا گیا۔
بین الاقوامی سطح پر بھی عصمت دری کے جرائم بے قابو ہو چکے ہیں۔ جس کے عتاب میں نہ صرف پسماندہ ممالک ہیں بلکہ امریکہ، کینیڈا، آسٹریلیا اور انگلینڈ جیسے ترقی یافتہ ممالک بھی شامل ہیں۔ یہ جرائم، دفاتر میں معمر خواتین سے لے کر سکول میں بچوں اور بچیوں تک کثیر تعداد میں پائے جاتے ہیں۔ اگر ہم صرف کینیڈا کی بات کریں تو پولیس کو رپورٹ کیے جانے والے تمام پرتشدد جرائم میں جنسی حملوں کی رپورٹ کی شرح میں تیزی سے اضافہ دیکھا گیا ہے۔
ہفنگٹن پوسٹ کے مطابق ملک میں ہر سال 460,000 جنسی حملوں کے واقعات ہوتے ہیں۔ جنسی زیادتی کے ہر 1,000 واقعات میں سے 33 پولیس کو رپورٹ کیے جاتے ہیں، اور 29 کو بطور جرم درج کیا جاتا ہے۔ کینیڈا جیسے ملک میں بھی اس کے قانونی پہلوؤں میں سقم ضرور پائے جاتے ہیں لیکن ہمارے یہاں تو قانون پر عمل در آمد کے لیے وسائل اور جرائم سے نمٹنے کے لیے فورسز کی تربیت ہی نہ ہونے کے برابر ہے۔
اس لیے انسداد عصمت دری کے لیے نافذ کردہ ایکٹ 2021 ء میں درج ذیل ترامیم کو متعارف کرانا بہت ضروری ہے۔ سب سے اہم بات یہ ہے کہ جرم اور اس سے متعلق معاملات کو چھپانے کے لیے ’ریپ‘ کی اصطلاح کو دوبارہ اور مناسب طریقے سے بیان کرنے کی کوشش کی جانی چاہیے۔ اس کے بعد سزا کے نظام کو واضح ہونا چاہیے جس کا مقصد اصلاح پر ہونا چاہیے نہ کہ بدلہ پر مبنی ہو۔ مجرم کو اپنی مقررہ سزا پوری ہونے کے بعد پچھتاوا اور معاشرے میں دوبارہ داخل ہونے کا موقع دیا جانا چاہیے۔
لہٰذا اس کی شناخت کے تحفظ کو اتنا ہی اہم سمجھا جانا چاہیے جتنا کہ متاثرہ کی شناخت کے تحفظ کو یقینی بنانا ہے۔ نادرا میں مجرموں کا رجسٹر معاشرے کے مخصوص حکام یا ایجنسیوں کے لیے قابل رسائی ہونا چاہیے بجائے اس کے کہ آبادی کے کافی بڑے حصے کو آسانی سے دستیاب ہو۔ خلاف ورزی کرنے والوں کے لیے سزا کا نظام قائم کرتے ہوئے ریکارڈ کی رازداری کو بھی یقینی بنایا جائے۔ مزید برآں، ایکٹ کے اندر ابہام اور تضاد کے امکانات کو کم کرنے کے لیے بہتر ڈرافٹنگ کو یقینی بنایا جانا چاہیے۔
خصوصی عدالتوں، انسداد عصمت دری کے کرائسز سیلز، خصوصی جنسی جرائم کی تحقیقاتی یونٹس کو موثر بنانے کے لیے وقت کے پابند جواب کو یقینی بنایا جانا چاہیے جو نہ صرف جنسی جرائم کی مزید رپورٹنگ کی حوصلہ افزائی کرے گی بلکہ وقت کے لحاظ سے حساس شواہد کو بروقت جمع کرنے اور محفوظ کرنے کا سبب بھی بنے گا۔ متاثرین اور گواہوں کی بہتر حفاظت کے لیے پورے ملک میں مناسب تعداد میں خصوصی سیف ہاؤس بنائے جائیں تا کہ ٹرائلز کے دوران متاثرین تک جرائم پیشہ افراد کی رسائی کم سے کم ہو۔ اگر حکومت ان سفارشات پر عمل درآمد کرانا شروع کرتی ہے تو ہمارے معاشرے میں عصمت دری کے واقعات میں نہ صرف خاطر خواہ کمی واقع ہو گی بلکہ متاثرین کو انصاف کی فراہمی جلد اور یقینی بنائی جا سکے گی۔
- کون بدن سے آگے دیکھے عورت کو - 09/12/2022
- بہت بے شرم ہے یہ ماں جو مزدوری کو نکلی ہے - 25/08/2021
- دیت: انصاف کا نظام یا نا انصافی کا آلہ؟ - 19/08/2021
Facebook Comments - Accept Cookies to Enable FB Comments (See Footer).