لاہور میں پچھلے دنوں جس تحقیقی ادارے کا افتتاح ہوا اس پر کچھ کنفیوژن سی پھیلی تھی۔ لوگ پوچھ رہے تھے کہ یہ حضرت ابو الحسن شاذلی کون ہیں، ان کا تصوف سے تعلق تو ظاہر ہے لیکن سائنس اور ٹکنالوجی سے ان کا کیا واسطہ بنتا ہے۔ سب سے بڑھ کر یہ جب ہمارے اپنے ہاں ایک سے ایک بڑا قطب اور ولی اللہ پڑا ہے دور مراکش یا تیونس سے بزرگ درآمد کرنے کی کیا ضرورت پڑ گئی۔ آج کل درآمدات کی ویسے بھی حوصلہ شکنی کی جا رہی ہے جس کے سبب ہمارا کرنٹ اکاؤنٹ بیلنس جگمگا رہا ہے۔