کس شخص کا درد تمہیں بتائیں۔ سمجھائیں کیونکہ تم سے ہمارا رشتہ صرف درد دینے کا ہے۔ اور میرے وہ سب لوگ جن سے درد سہنے کا رشتہ ہے میں آج ان کی بات کروں گا۔ آج میں تمہیں بتاؤں گا کہ لوہے کی سلاخ سے پیٹے جانے کے باوجود ان کال کوٹھریوں میں شدید گرمی یا سردی میں بھی وہ کتنے خوبصورت خواب دیکھتے ہیں۔ وہ خواب اتنے خوبصورت ہوتے ہیں کہ وہ اپنے سارے درد بھلا دیتے ہیں۔ تم ان کو اپنی پوری طاقت سے پیٹتے ہو ان کے جسموں کو سگریٹوں سے جلاتے ہو۔ ان کے ناخن نکالتے ہو۔ پھران کو بتاتے ہو کہ یہ کتنی ”عظیم دیوار“ ہے اور ان کو سمجھاتے ہو کہ اس ”دیوار“ کی تمہیں تعظیم کرنی ہے۔ اور سینہ تان کے کہتے ہو کہ ہم اس دیوار کے داروغے ہیں۔ اور یہ خداداد دیوار کتنی مقدس ہے۔ اس دیوار کے اندر قید رہنا اور اپنی یاداشت کھو دینا کتنا اہم ہے۔