ایہدے پچھے اسٹیبلشمنٹ دا ہتھ اے
میری گھروالی دی ٹیم سِر اکھ نہ کھلن پاروں نماز دا وہلا لنگ جائے تے اوہنوں ایہ بھل جاندا اے کہ راتی دیر تک ڈرامہ ویہندی رہن دے کارن دیر نال سُتی سی فورن فتوی لا دیندی اے ” اک تے شیطان پچھے پیا رہندا اے ۔۔جاگن ای نئں دیندا ” بوہتے ورھے نئں لنگے جدوں بے نظیر دی حکومت سی تے فیر اوہدوں وی جدوں زرداری صدر سی پوری قوم دا ، خاص کر پی پی پی مخالفاں دا تکیہ کلام سی ” زرداری نے کروایا اے ” کسے دا منڈا فیل ہو جانا تے زرداری نے فیل کرایا اے ۔۔محلیوں کُڑی چُکی جانی تے زرداری نے چکوائ اے ۔۔مری وچ چھوٹے پیشاب دے ریٹ ودھ جانے تے زرداری نے ودھاے نیں ۔۔۔ ایس قسم دی سوچ تے ہر گل پچھے کِسے سازش دی تلاش نوں نظرئیہ سازش یا Conspiracy Theory آخدے نیں ۔ پاکستان وچ ایہ نظریہ کی خاص تے کی عام ، کی وڈا تے کی چھوٹا ، کی مرد تے کی عورت سب وچ بوہت مقبول اے ۔۔ایہدا استعمال بوہت آسان اے کیوں جے ایہدے استعمال وچ عقل استعمال نئں ہوندی ۔ بس کسے وی ایسے بندے یا ادارے دا نام لگا دوو جہنوں تُسی پسند نئں کردے ۔ نظریہ سازش دی مقبول ترین مثال یہودی سازش اے ۔۔دوجے نمبر تے امریکی سازش تےفیر انڈیا دی سازش طراں ہور وی کئی پسندیدہ سازشاں گنوائیاں جا سکدیاں نے جناں دا ہتھ ملک وچ یا ملکوں باہر وی پیش آون والے کسے واقعہ پِچھے ہوندا اے ۔۔۔ چونکہ نظریہ سازش استعمال کردیاں عقل کولوں کم نئں لیا جاندا ایس کر کے اسی کسے رونما ہون والے واقعہ دی اصل وجوہات دا کھوج لان توں محروم ہو جانے آں ۔۔جیہدا نتیجہ ایہ نکلدا اے کہ چونکہ سانوں پتہ ای نئں ہوندا کہ ایس واقعہ دی اصل وجوہات کی نیں اسی اصل مسلے نوں نہ تے حل کر سکنے آں تے نہ ای حل کرنا چاہنے آں ۔۔سانوں تسلی ہوجاندی اے کہ ایس انہونی پچھے صیہونی یا امریکی سازش اے ، جہدا مقابلہ اسی کر ای نئں سکدے ایس لئی بہتر اے کہ ساڑھ پھک کے خموش ہو جائیے .
ہون گھٹ و گھٹ اک سال توں ، انج کہہ لوو ک جدوں دا نواز شریف پانامہ یا اقامہ کیس وچ پھسیا اے نواز حمائتی تے عمران مخاف حلقیاں وچ ” ایہدے پچھے اسٹیبلشمنٹ دا ہتھ وے ” والا تکیہ کلام بوہت مقبول اے ۔۔۔کُج لوک ایس گل نوں انج پیش کردے نیں کہ ایسٹیبلشمنٹ نے اک سکرپٹ لخیا دا اے تے عدلیہ تے نیب سمیت ملک دے سارے ادارے اوسے سکرپٹ دی مطابق چلا ے جاندے نیں ۔۔اسٹیبلشمنٹ اپنے ایجنڈے نوں ایس طریقے نال ودھاندی اے کہ سیاسی قوتاں وی اوہدے اگے بے بس ہو کے اوہو کُج کرن تے مجبور ہو جاندیاں نیں جو کہ اسٹیبلشمنٹ چاہندی اے تے انج اسٹیبلشمنٹ اپنی مرضی دے نتیجے حاصل کرن وچ کامیاب ہو جاندی اے ۔۔دلچسپ گل ایہ کہ پاکستان نوں بنیاں 71 سال ہوئے نیں تے نظریہ اسٹیبلشمنٹ پیش کرن والیاں دا دعوی اے کہ ملک وچ جو کُج وی سیاہ وسفید ہوندا رہیا اے اوہدے پچھے اسٹیبلشمنٹ دا ہتھ اے پر جِنے شور شرابے نال پشلے اک سال توں اسٹیبلشمنٹ دی کاروائیاں دا چرچہ ہویا اے اوہدی پاکستان دی گزشتہ 70 سالہ تریخ وچ مثال نئں ملدی ۔ اسٹیبلشمنٹ ہے کی؟ ایہدے ڈکشنری معنی تے جو وی نیں پر پاکستان وچ ایہدے توں مراد حاضر تے ریٹائرڈ جرنیلاں دا گروہ لیا جاندا اے جیہڑا خفیہ تے علانیہ اقدامات دے ذریعے ملک دے اداریاں نوں کنٹرول کردا ، سیاسی اکھاڑ پچھاڑ دے عمل وچ بالوسطہ شریک ہوندا تے حکومتاں گران تے بنان دے عمل وچ ملوث ہوندا اے ۔۔۔ چونکہ ایہناں جرنیلاں وچ پنجابی جرنیلاں دی اکثریت اے ایس کر کے ایہنوں پنجابی اسٹیبلشمنٹ وی آخدے نیں
ایس حقیقت نوں منن وچ کوئ عذر نئں ہونا چاہی دا کہ اسٹیبلشمنٹ ملکی اداریاں تے اثر انداز ہو کے اپنی مرضی دے سیاسی نتیجے حاصل کرن لئی بوہت کُج کردی اے ۔پاکستان دی سیاسی تریخ وچ اصغر خاں کیس ایہدی سب توں وڈی مثال اے جہدے وچ ساڈے مشہور سیاستداناں دا ذکر اے جہناں نوں اسٹیبلشمنٹ نے اپنا ایجنڈا اگے ٹورن لئی نقد پیسے دتے سن۔ نواز شریف نوں پچھاڑ تے عمران خان نوں اگے لیان وچ اسٹیبلشمنٹ دے مبینہ کردار نوں وی نظر انداز نئی کیتا جا سکدا لیکن ملک وچ آون والی ہر تبدیلی تے اخباراں وچ چھپن والی ہر شہ سُرخی پچھے اسٹیبلشمنٹ دا ہتھ تلاش کرنا اصل حقیقتاں توں مونہ موڑن والی گل ایہ ۔۔ نواز شریف جدوں کہندا اے مجھے کیوں نکالا ؟ یا ایہ کہ پانامہ دی تھاں اقامہ پر نکالا ؟ تے کی اوہنوں نئں سی پتہ کہ ملک دا وزیر اعظم ہو کے تینوں اقامہ لے کہ پُتر دی کمپنی وچ فیک نوکری کرن دی کی مجبوری سی؟ کی اسی معاملے دا کُھرا گھسیٹ کے اسٹیبلشمنٹ نال ملان دی کوشش کرکے اصل حقیقتاں تے پردہ پان دی یا اوہناں نوں جانن توں گریز کرن دی کوشش تے نئ کر رہے ہوندے ۔۔
میں اک پنجابی سیوک ہون دی حیثیت نال پنجاب دے اینٹی پنجابی حاکماں تے پنجاب دی آبادی دے اندازن 90 فیصد برین واشڈ پنجابیاں نوں بری کر کے پنجابی تے ہون والی زیادتیاں دی ساری ذم واری اسٹیبلشمنٹ تے پا دیاں تے ایہدا مطلب پنجابی کاز نوں نقصان پہونچان دے علاوہ کُج نئں ہووے گا . میری با شعور پنجابی سیوکاں توں بنتی اے کہ پنجابی کاز واسطے غیر جذباتی ہو کے تے کسے قسم دے وی تعصبات توں دامن جھاڑ کے کم کرن ۔۔ تے ہر بھیڑے چنگے کم پچھے اسٹیبلشمنٹ دا ہتھ تلاش کرن دی بجائے اوہنوں اپنے کاز دی حمائیت لئی قائل کرن ۔۔
- ایہدے پچھے اسٹیبلشمنٹ دا ہتھ اے - 20/08/2018
Facebook Comments - Accept Cookies to Enable FB Comments (See Footer).