صاحبان شعر و ادب اور صاحب مطالعہ خوب جانتے ہیں۔ لاہور کے انار کلی کے فٹ پاتھ کو جہاں اتوار کی صبح نوادرات کتب کا میلہ سجتا ہے۔ اس ڈیجیٹل دور میں بھی کتب بین ڈھونڈ ڈھونڈ کے دنیا جہاں کی نایاب کتابیں سستے داموں اپنی لائبریری کی زینت بنا لیتے ہیں۔ میرا جب بھی لاہور جانا ہوا مال روڈ پر دو تین جگہ ضرور جاتا ہوں۔ سب سے پہلے فیروز سنز جانا۔ وہاں کھڑے کھڑے ایک دو گھنٹے درجنوں کتابوں کے فلیپ، پیش لفظ، مضامین کی ورق گردانی اور صاحب کتاب کا حال احوال پڑھنا۔ جب تھک جانا باہر نکل کے الفلاح سنیما کے گیٹ پر نان ٹکیاں کھانا۔ اور پھر خراماں خراماں چلتے ہوئے پاک ٹی ہاؤس جا گھسنا۔ البتہ انار کلی اتوار کی صبح جاتا تھا۔ ( اب فیروز سنز نہیں رہا اور نہ الفلاح سنیما کے گیٹ پر نان ٹکیاں )

بزم ارباب نشاط کا ہفتہ وار ادبی اجلاس جاری تھا۔ ٹی ہاؤس سینئر جونیئر شعراء اُدباء سے بھرا تھا۔ ’جی بہت شکریہ آپ نے مجھے آج موقعہ دیا۔ ‘ ایک نئے آموز کہانی کار تابش دوتانی نے گلہ صاف کیا۔ پھر سب پر ایک نگاہ ڈالی۔ پھر ایک لمبا سانس لیا اور گویا ہوا۔ ’شگفتہ دیہات کی الہڑ مُٹیار لڑکی جو پڑھی لکھی تو نہ تھی۔ ‘’ میاں یہ افسانہ ہے یا کہانی۔ ؟ ‘ حماد راہی ایک بزرگ کہانی نگار نے اک عجیب سا برا منہ بناتے ہوئے سوال داغا۔