فلم ’سنجو‘ میں سنجے دت کی پہلی بیوی کے بارے میں کیوں نہیں بتایا گیا؟ بابا نے خاموشی توڑ دی

بالی ووڈ کے معروف اداکار سنجے دت نے سابقہ بیویوں رچا شرما اور ریہا کو فلم ’سنجو‘ میں شامل نہ کرنے پر خاموشی توڑ دی۔

بالی ووڈ میں سنجو بابا کے نام سے شہرت پانے والے اداکار سنجے دت کی زندگی پر مبنی فلم ’سنجو‘ نے بھارت بھر میں ریکارڈ کمائی کرکے متعدد اعزاز حاصل کیے لیکن فلم میں سنجے دت سے جڑی اہم باتوں کو فراموش کرنے پر تنقید کا نشانہ بھی بنایا گیا۔

سنجے کی بیٹی تریشالا دت بھی اپنے والد کی زندگی پر بننے والی فلم میں خود کے اور اپنی والدہ یعنی سنجے دت کی پہلی بیوی کا تذکرہ نہ ہونے پر خوش دکھائی نہیں دیں تاہم سنجے دت نے اپنی بیویوں سے متعلق جاری خبروں پر لب کشائی کردی۔

بھارتی میڈیا رپورٹس کے مطابق بالی ووڈ کے نامور اداکار سنجے دت کا کہنا ہے کہ جب فلم کی کہانی لکھی جارہی تھی تو میں نے فلم میکر سے اپنی زندگی سے جڑی متعدد خواتین سے متعلق معلومات انہیں فراہم کیں لیکن میں نے انہیں یہ نہیں کہا کہ کس کو فلم میں شامل کرنا ہے اور کس کو نہیں۔

سنجے دت نے مزید انکشاف کیا کہ معلومات دیتے وقت میں نے فلم میکرز کو اپنی سابقہ بیویوں رچا شرما اور ریہا سمیت دیگر خواتین کو فلم میں شامل نہ کرنے سے متعلق کچھ نہیں پوچھا بلکہ فلم میکرز نے خود ہی میری زندگی کے اہم پہلوؤں کو فلم میں شامل کرنے کا انتخاب کیا اور ممکن ہے کہ فلم میکرز نے فلم کے دورانیے کو مد نظر رکھتے ہوئے شاید کچھ کرداروں کو فلم سے باہر کردیا ہو۔

واضح رہے کہ سنجے دت کی پہلی شادی ریچا شرما سے ہوئی جن سے ان کی ایک ہی بیٹی تریشالا دت ہیں اوران کی دوسری بیوی سے کوئی اولاد نہیں تاہم سنجے دت کی زندگی پر مبنی فلم میں ان دونوں شادیوں کا تذکرہ نہیں کیا گیا بلکہ صرف ان کی تیسری بیوی منیاتا دت کو دکھایا گیا۔