میرا خیال تھا پورے پاکستان میں فقط میں ہی وہ دکھیاری غموں کی ماری ہوں جسے وطن عزیز کی روز بروز بڑھتی ہوئی آبادی کے خیال سے ڈراؤنے خواب آتے رہتے ہیں۔ یہ سوچ کر ڈر لگتا ہے کہ آبادی کا جن تو سچ مچ اب بوتل سے باہر آ چکا ہے اور باہر نکل کر سوچ رہا ہے کہ جاؤں تو جاؤں کہاں۔ اس ملک پاکستان میں تو تل دھرنے کو بھی جگہ نہیں بچی۔ ننھے منے بلا مقصد پیدا کیے گئے کروڑوں بچے کاکروچوں کی طرح کونوں کھدروں سے نکل کر سب کچھ ہڑپ کرتے جا رہے ہیں۔

نہ روٹی ہے نہ پانی ہے، روندی ساڈی نانی ہے۔ بجلی گیس بھی کم کم دستیاب ہے۔ رقبہ سکڑ رہا ہے، سیمنٹ کے جنگل پھل پھول رہے ہیں۔ رہنے کے قابل صرف ڈی ایچ اے رہ گیا ہے۔ لوگ بھوک کے بازار میں ایمان، دھرم، آدرش، فلسفے عقیدے سبھی کچھ بیچ رہے ہیں، آخر میں کھانے کو کچھ نہیں بچے گا اور ڈر ہے کہ کسی دن ایک دوسرے کو ہی نہ چیر پھاڑ کر کھا جائیں۔ یقین جانیے یہ سب اس جن نے مجھ سے ہمکلام ہو کر خود کہا ہے۔ جھوٹ نہیں بول رہی۔