فوجی طیارہ حادثہ: ’بابا سکول کی کتابیں لیکر دو نا‘
راولپنڈی کے نواحی علاقے موہڑہ کالو میں آرمی ایوی ایشن کا طیارہ گر کر تباہ ہونے کی وجہ سے سرکاری اطلاعات کے مطابق 18 افراد ہلاک ہوئے ہیں۔ ہلاک ہونے والوں میں ایک ایسا گھرانہ بھی ہے جس کے آٹھ افراد اس حادثے میں گہری نیند سے ابدی نیند ہی سو گئے۔
عینی شاہدین کے مطابق جہاز کے گرنے کا دھماکہ اتنا شدید تھا کہ اس میں ہلاک ہونے والوں کی چیخیں اس دھماکے میں ہی دب کر رہ گئیں۔
عبدالحمید جو کہ راولپنڈی کی تحصیل گوجر خان میں ایک ہوٹل پر بیرے کا کام کرتے تھے وہ اپنے اہل خانہ کے ہمراہ گذشتہ 20 سال سے موہڑہ کالو میں رہائش پذیر تھے۔ وہ حادثے سے چند گھنٹے قبل ہی اپنے چھوٹے بھائی محمد خان سے ملنے راولپنڈی کے علاقے سوہاوہ گئے تھے۔
یہ بھی پڑھیے
’بھائی، بھابھی، بھتیجا سب جل کر راکھ ہو گئے‘
راولپنڈی: فوجی طیارہ آبادی پر گر کر تباہ، 18 ہلاک
راولپنڈی میں رہائشی علاقے پر طیارہ گرنے سے ہلاکتیں
پاکستان میں فضائی حادثات کی تاریخ
2018 میں فضائی حادثات سے ہلاکتوں میں اضافہ
محمد خان نے بی بی سی کو بتایا کہ ان کے بڑے بھائی کاروبار کے سلسلے میں ان سے ملنے کے لیے سوہاوہ پہنچے تھے۔ ان کا کہنا تھا کہ عبدالحمید گھر جانے کی بجائے گوجر خان سے ہی اس سے ملنے سوہاوہ پہنچے تھے۔ ان کی حادثے سے چند گھنٹے قبل ان کے بھائی کے اہلخانہ سے فون پر بات ہوئی تھی۔
محمد خان کے مطابق عبدالحمید کی چھوٹی بیٹی بشریٰ جو کہ ایک مقامی سکول میں تیسری جماعت کی طالبہ ہے، اپنے والد سے کہہ رہی تھی کہ بابا میرے پاس سکول کی کچھ کتابیں نہیں ہیں جس پر سکول ٹیچر نے اُسے ڈانٹا ہے اسے لیے اس نے سکول کی کتابیں لینی ہیں۔
محمد خان نے بتایا کہ بشریٰ نے اپنے والد سے کہا ‘بابا مجھے سکول کی کتابیں لیکر دو نا’، جس پر عبدالحمید نے اپنی بیٹی سے کہا کہ وہ کل واپس آکر اسے ساتھ لے جائے گے اور کتابیں خرید کر دیں گے۔
محمد خان یہ بات کرتے ہوئے زارو قطار رو پڑے اور ہچکیاں لیتے ہوئے کہا کہ بشریٰ کو کیا معلوم تھا کہ اب وہ سکول نہیں جائے گی۔
اُنھوں نے کہا کہ اس واقعہ میں عبدالحمید کی بیوی اور چار بچے ہلاک ہوئے ہیں جن میں ایک 14 برس کا بیٹا بھی شامل تھا جس سے انھوں نے امیدیں لگا رکھی تھیں کہ وہ جوان ہو کر اس کے بڑھاپے کا سہارا بنے گا۔ لیکن یہ ایسا خواب تھا جو اب کبھی حقیقت نہیں بن سکتا۔
اس واقعہ میں عبدالحمید کی ایک کمسن بیٹی زندہ بچی ہے جو اس حادثے میں شدید زخمی ہیں اور مقامی ہسپتال میں زیر علاج ہیں۔ دیگر ہلاک ہونے والوں میں عبدالحمید کے برادر نسبتی بشیر، ان کی بیوی اور بیٹی شامل ہے۔
محمد خان کے مطابق یہ سارے افراد ایک ہی گھر میں رہتے تھے۔ محمد خان کے مطابق جہاز کا ملبہ ان کے بھائی کے گھر کے ایک حصے پر گرا جس سے گھر کا وہ حصہ زمین بوس ہو گیا اور وہاں پر موجوہ تمام افراد زندہ جل گئے۔ محمد خان یہ کہتے ہوئے دوبارہ زارو قطار روپڑے اور کہنے لگے کہ وہ کس کس کی لاش کو اُٹھا کر دفنائیں گے۔
محمد خان کا کہنا تھا کہ عبدالحمید کے سسر قلم خان جو کہ رشتے میں اس کے چچا بھی ہے، وہ بھی اسی گھر میں رہتے ہیں تاہم حادثے سے چار پانچ گھنٹے پہلے وہ کسی کام کے سلسلے میں مری چلے گئے تھے۔
اس حادثے میں زیادہ ہلاکتیں جل جانے کے باعث ہوئی ہیں اور لاشیں قابل شناخت بھی نہیں ہیں جس کی وجہ سے ہلاک شدگان کے ورثا کا ڈی این اے ٹیسٹ کروایا جارہا ہے تاکہ لاشوں کی شناخت میں مدد مل سکے۔
حادثے کے بعد سیکیورٹی اداروں نے علاقے کو گھیرے میں لے لیا اور کسی بھی غیر متعلقہ شخص اور بلخصوص میڈیا کے نمائندوں کو جائے حادثہ پر جانے کی اجازت نہیں تھی۔
موہڑہ کالو میں جہاز گرنے کا واقعہ پیر اور منگل کی درمیانی شب پیش آیا اور اس وقت جائے حادثے پر جانے کے لیے میڈیا نمائندوں پر کوئی پابندی نہیں تھی لیکن منگل کی صبح جب مقامی میڈیا پر اس واقعہ کی فوٹیج چلنا شروع ہوئیں تو حکام کو ہوش آیا اور اُنھوں نے تمام میڈیا کے ارکان کو جائے حادثہ کے قریب جانے وہاں کی تصاویر لینے سے روک دیا۔
بی بی سی اردو کے نمائندے شہزاد ملک کے مطابق جب انھوں نے عبدالحمید کے گھر کا دورہ کرنے کی کوشش کی تو وہاں پر موجود سیکیورٹی اہلکاروں نے انھیں روک لیا اور کہا کہ ’بھائی صاحب یہ اب ممنوعہ علاقہ ہے آپ یہاں نہیں جاسکتے۔‘
- ’گندم خشک کرنے کی کوشش‘ یا جنگی مشق: سوشل میڈیا پر فوجی ہیلی کاپٹروں کی وائرل ویڈیو کی حقیقت کیا ہے؟ - 01/05/2024
- امریکہ میں 1.3 ارب ڈالر کی لاٹری جیتنے والا شخص: ’مجھے نہیں پتا یہ رقم خرچ کرنے کے لیے میرے پاس کتنا وقت ہے‘ - 01/05/2024
- کولمبیا یونیورسٹی سے فلسطین کے حامی مظاہرین کی گرفتاری: امریکی جامعات میں احتجاج کرنے والے طلبہ کیا چاہتے ہیں؟ - 01/05/2024
Facebook Comments - Accept Cookies to Enable FB Comments (See Footer).