ٹیوشن والا بھائی

اسکول کی موجودگی کے باوجود ٹیوشن کا رواج ہمارے معاشرے میں نمایاں ہے بچے،پہلے دن کا حصہ اسکول میں گزارتے ہیں اور گھر آنے کے بعد ٹیوٹر گھر آکر پڑھاتا ہے۔ ٹیوشن کے بڑھتے ہوئے رجحان سے کئی بے روزگار نوجوانوں کا سلسلہ آمدن چلا ہوا ہے۔ ہمارے ہاں جو کوئی کام نہیں کر سکتا وہ ٹیوشن ضرور پڑھا سکتا ہے۔ ٹیوشن پڑھانے کے لیے تعلیم کی کوئی خاص ضرورت نہیں کیونکہ کوئی بھی آپ کی تعلیمی اسناد نہیں دیکھتا ضرورت ہے تو ایک عدد موٹر سائیکل کی جس کی بدولت آپ زیادہ سے زیادہ ٹیوشن پڑھا سکیں۔ جام صاحب کے ایک دوست بھی ٹیوشن پڑھاتے تھے اسی وجہ سے وہ ٹیو شن والے بھائی کے طور پر جانے اور پہچانے جاتے تھے۔ وہ صاحب، جب ہر محکمہ سے ٹھکرا دیئے گئے اور کسی نے ان کو نائب قاصد بھرتی کرنا بھی محکمہ کی توہین سمجھا  تو انہوں نے ٹیوشن پڑھانے کا آغاز کیا آج وہ کامیاب ٹیوشن والے بھائی ہیں۔ ان کی طلب اور رسد دور، دور تک ہے۔ جن محکموں کے سربراہان نے ان کو نوکری دینے سے انکار کیا تھا۔ اب وہ ان کے بچوں کو ٹیوشن پڑھاتے ہیں اور وہ بھی منہ مانگی فیس پر۔ ان کا خیال ہے کہ ان بچوں کا مستقبل روشن ہے کیونکہ وہ ٹیوشن پڑھتے ہیں۔ ٹیوشن والے بھائی بہت مصروف آدمی ہیں ان سے جام صاحب کو ہمیشہ گلہ رہتا ہے آپ ملتے نہیں ہیں اوپر سے وہ جواب دیتے ہیں کہ نئی نسل کو سنوارنے میں وہ دن رات مصروف رہتے ہیں۔ یہاں تک کہ اتوار والے دن بھی بچوں کو اپنے گھر بلا کر ان کا مستقبل روشن اور اپنی جیب گرم کرتے رہتے تھے۔

ٹیوشن والے بھائی فرماتے تھے کہ ہم نتائج دیتے ہیں یہ امیروں کی لاڈلی اور نکمی اولادوں کو پڑھانا کسی جہاد سے کم نہیں ۔ ان کے نخرے نہیں ختم ہوتے اور ہم ان کے نتائج بہتر کر دیتے ہیں۔ وہ کہتے تھے جس گھر میں بھی ٹیوٹر آتا ہے اس کا مطلب یہ ہے کہ بچہ نکما نہیں بلکہ والدین نکمے ہیں۔ اگر والدین نکمے نہ ہوتے تو وہ ٹیوٹر کو اتنی زیادہ فیس ٹیوشن میں کیوں دیتے۔ دوسرا ان کا فرمان تھا، ٹیوشن والے بچے کبھی پوزیشن نہیں لیتے بلکہ پاس ہوتے ہیں۔ کہتے ہیں مجھے حیرت ہوتی ہے جب نکمے والدین اپنی اولاد کو فلاسفر دیکھنا چاہتے ہیں حالانکہ نکمے کے بچے نکمے ہی ہوتے ہیں لیکن اگر یہ فارمولا ٹوٹ جائے تو اس کو برائے مہربانی مثال نہ بنائیں۔
جام صاحب کہتے ہیں ہم کو تو لگتا ہے ان کا تن، من صرف ٹیوشن پڑھانے اور موٹر سائیکل چلانے کے لیے بنا ہے۔ ہماری دعا ہے کہ وہ ٹیوشن پڑھاتے رہیں اور بچوں کو کامیاب بناتے جائیں۔