عمران خان نے اقتدار میں آنے سے قبل ہی ملک سے عدم مساوات کے خاتمے کا عزم کر لیا تھا، موجود پاکستانی اسی عزم کی تصویر ہے۔ عمران خان نے اپنی سیاست کے آغاز پر ہی کہہ دیا تھا کہ اس ملک کا سب سے بڑا مسئلہ نا انصافی اور عدمِ مساوات ہے۔ امیر مزید امیر ہوتا جارہا ہے اور غریب مزید غریب ہوتا جارہا ہے۔ امیر کے لیے قانون اور ہے غریب کے لیے اور ہے۔ اشرافیہ کا نصاب

گئے وقتوں کی بات ہے، محلے کی ایک لڑکی سے ہمیں ایک طرح کا واسطہ ہو گیا تھا۔ بڑوں کی نظر میں یہ ایک ناجائز تعلق تھا، مگر یہی ایک تعلق تھا جو ہم کو بہت جائز تھا۔ نظروں میں آئے تو کیا دوست کیا دشمن، سبھی ناصح بن گئے۔ ہر نصیحت جب بے کار گئی تو دور گجر نالے کے پاس ایک کمرے کے مکان میں رہنے والی ایک پیرنی کی روحانی خدمات حاصل کرلی گئیں۔ لوگوں کے فیملی

ایسا پہلی بار تو نہیں ہوا۔ ہمیشہ سے ہی زمانے کا چلن یہ رہا ہے کہ جس چیز کا سِرا ہاتھ نہ آئے اُسے دیوتاوں سے جوڑ دو۔ آسمان سے پانی برسا تو حیرت سے انسان انگلیاں دانت میں دباکر آسمان کو تکنے لگا۔ یہ سب کیا ہو رہا ہے اور کیسے ہو رہا ہے۔ علم محدود تھا، تو بس اتنا سا خیال آیا کہ کوئی تو ہے جو نظامِ ہستی چلا رہا ہے۔ آگے چل کر یہ "کوئی” دیوتا

فرمایا گیا جن لوگوں نے احسان اللہ احسان کو نشانے پہ رکھا ہوا ہے، وہ انڈیا اور افغان انٹیلی جنس کے اس کردار پر بات کیوں نہیں کرتے جس انکشاف احسان اللہ احسان نے کیا” عرض کیا نہیں، بات یہ نہیں ہے۔ بھارتی اورافغان انٹیلی جنس کا کردار کوئی انکشاف نہیں ہے. یہ تو سامنے کی حقیقت ہے۔ اس حقیقت کے سرے مگر ہمارے گریبان میں ہیں۔ ہم نے ملاعمر کو افغانستان میں اقتدار سونپا۔ اس اقتدار کی تشکیل میں

ہندوستان نے ہماری روایت پر عمل کرتے ہوئے جب اپنی سیاست کی بنیادوں میں مذہبی انتہا پسندی کا پانی چھوڑنا شروع کیا تو فہمیدہ ریاض نے ایک نظم کہی۔ تم بالکل ہم جیسے نکلے، اب تک کہاں چھپے تھے بھائی؟ سید کاشف رضا نے محمد حنیف کے ناول کا اردو ترجمہ کیا تو جنرل ضیا الحق کے فرزند ارجمند کے پلے بھی پڑگیا۔ گیارہ برس لگے جنرل ضیا کو اقتدار سے جاتے جاتے۔ گیارہ ہی برس لگے اعجازالحق کو ناول

اسماعیل شاہد معروف پشتو مزاحیہ اداکار اور ہدایت کار ہیں۔ پی ٹی وی کے فیتوں پر اردو میں بھی ان کا کام ریکارڈ ہے۔ پی ٹی کے مشہور زمانہ ڈرامہ سیریل ”جھوٹ کی عادت نہیں مجھے“ میں مرکزی کردار انہی کا تھا۔ پی ٹی وی پر ہی ان کا ایک ریکارڈ ساز پشتو ڈرامہ ”مڑی پہ شمار دی“ چلا۔ اسماعیل شاہد اس ڈرامے میں گوالے پرنسپل کا کردار نبھارہے ہیں۔ ڈرامے کا خاکہ یہ ہے کہ میاں گوالے نے باڑے کی پچیس بھینسے بیچ کر اسکول کی بنیاد رکھ دی ہے۔ کھولتے وقت اس کا احساس تھا کہ اسکول بھی ایسے ہی چلے گا جیسے بھینس کا باڑا چلتا تھا۔ اب جب اسکول کھلا ہے تو دودھ پانی کا فرق بھی معلوم ہوگیا۔

بچپن کی یادوں میں اماں کا ایک جاپانی ریڈیو بھی ہے۔ یہ اپنے زمانے کا سب سے بہترین ریڈیو ہوا کرتا تھا جس پر کتھائی رنگ کی ایک لیدر چڑھی ہوئی تھی۔

اماں ہماری ناخواندہ ہیں مگر جاہل ہر گز نہیں ہیں۔ انیس سو نواسی سے لے کر دوہزار چھ تک کی کرکٹ کی تاریخ کا انہیں بطور خاص ادراک ہے۔ کرکٹ کے نئے دور میں انہیں کچھ خاص دلچسپی نہیں ہے مگر شوق انہیں کرکٹ کی جاری سرگرمیوں سے غافل بھی نہیں ہونے دیتا۔ کرکٹ کے حوالے سے اُن کا درک بہت واجبی سا ہے مگر اتنا واجبی بھی نہیں ہے۔ انضمام الحق ان کے پسندیدہ کھلاڑیوں میں سرفہرست رہے ہیں۔ عمران نذیر اور محمد آصف کے ٹیم سے چلے جانے ہر انہیں ہمیشہ دکھ رہا۔ شعیب ملک کا ہمیشہ ٹیم کا حصہ ہونے کو وہ سمجھ سے بالاتر معاملہ قرار دیتی رہی ہیں۔ ہزار حجتوں کے بعد بھی شاہد آفریدی کو کبھی کوئی ان کی گُڈ بک میں شامل نہیں کروا سکا۔

کشمیر کا بنیادی مسئلہ یہ ہے کہ مسئلہ کشمیر میں خود کشمیر سرے سے فریق ہی نہیں ہے۔ کشمیر کے فریق ہمیشہ سے ہندوستان اور پاکستان ہیں۔ تیسری کوئی چیز اگر ہے تو وہ عالمی طاقت ہے جس نے کشمیر کے معاملے میں اپنا قلمی نام ”ثالث“ رکھا ہوا ہے۔ خطے میں اُس نے کوئی چال چلنی ہو تو ثالثی کے عنوان سے چلتا ہے۔ خود کشمیریوں کے حصے میں جو کردار آتا ہے اسے فلم کی زبان میں سائیڈ رول کہتے ہیں۔ ہدایت کاروں کے لیے سائیڈ رول نبھانے والوں کی کچھ ایسی حیثیت بھی نہیں ہوتی مگر ان کے بغیر فلم پوری بھی نہیں ہوتی۔ کشمیر کی فلم میں کشمیری صرف نعرے لگاسکتے ہیں، ہڑتال کرسکتے ہیں، بکتر گاڑیوں پر پتھراؤ کرسکتے ہیں اور انجامِ کار اپنی قیادت کو گرفتار یا نظربند ہوتا ہوا دیکھ سکتے ہیں۔

کیا باہر کی دنیا میں جنسی زیادتی اور ہراسانی کے واقعات نہیں ہوتے؟ کم ہوتے ہیں، مگرہوتے ہیں۔ بالکل ہوتے ہیں، مگر ایک فرق ہے۔ باہرکی دنیا میں ہراسانی کے بعد بچے یا خاتون کو شکایت درج کراتے ہوئے کوئی جھجک نہیں ہوتی۔ کیونکہ وہ جانتے ہیں کہ ہماری شکایت کے بعد والدین بدنامی کے ڈر سے خاموشی کی تجویز نہیں دیں گے۔ خاندان والے پیشگی عدالت لگا کر اپنی روایت کے مطابق بہر دو صورت لڑکی یا بچے کو غلط قرار نہیں دیں گے۔ معاشرے کے دیگر طبقات اور سوشل میڈیا صارفین بات سنے بغیر ہماری ذات پر سستے لطیفے ارزاں نہیں کریں گے۔

آج سے کوئی تین برس قبل پاکستان ویمن کرکٹ ٹیم کی ایک پلئیر نے دبے لفظوں میں شکایت کی کہ مینیجمنٹ انہیں ہراساں کرتی ہے۔ اس آواز میں چار آوازیں اور شامل ہوگئیں۔ کچھ دن بعد اس موضوع پر ایک ٹاک شو ہوا۔ پانچ پلئیرز نے کوچ کی موجودگی میں کھل کر تلخ تجربات کا اظہارکیا۔ ٹاک شو کے ٹکڑے سوشل میڈیا پر پھیل گئے۔ آج بھی دیکھا جاسکتا ہے کہ ان ویڈیوز کے اوپر کیپشن کیا ہیں اور نیچے تبصرے کیسے ہیں۔ زیادہ تر لوگوں نے اس بنیاد پر لڑکیوں کو ہی قصور وار ٹھہرایا کہ وہ گھر سے نکلی ہی کیوں۔ انہوں نے لہو لعب کی دنیا اختیار ہی کیوں کی۔ جب وہ میدان میں دوڑیں گیں، تو ظاہر ہے مردوں میں جنسی ہیجان تو پیدا ہوگا۔

کیا آپ پاکستانی ہیں؟

جواب: دیکھیے، کسی پاکستانی کو اس کے پاکستانی ہونے کا سرٹیفکیٹ دینے کا اختیار صرف نادرا کے پاس ہے۔ نادرا نے یہ سرٹیفیکیٹ مجھے دیا ہوا، اگر آپ چاہیں تو میں دکھا دیتا ہوں؟

آپ کے پاس نادرا کا سرٹیفیکیٹ موجود ہے، آپ پاکستان کے شہری ہیں، اس کے باوجود بھی پاکستان کی اس قدر مخالفت؟ آخر کیا وجہ ہے؟

آپ کہہ سکتے ہیں۔ آپ کو ایسا کہنے سے کون روک سکتا ہے۔ کہنے والوں نے تو صمد خان، باچا خان، بزنجو، ولی خان، عطا اللہ مینگل، جی ایم سید سب کے بارے میں یہی کہا کہ یہ پاکستان کے دشمن ہیں۔ یہاں تک کہ فاطمہ جناح کے متعلق کہا گیا کہ وہ غدار ہے۔ آپ سوچیں کہ یہ سب جنہیں غدار کہا گیا ان کے بیچ کون سی چیزیں یکساں ہیں۔ دو چیزیں ہیں۔ ایک یہ کہ یہ سارے لوگ اپنے لوگوں کے لیے حقوق مانگتے تھے۔ اب جب آپ حقوق مانگتے ہیں تو اس سے ریاست کی بالادست طاقتوں کے مفاد پر زد پڑتی ہے۔ جب زد پڑتی ہے تو وہ پروپیگنڈا شروع کردیتے ہیں کہ یہ ملک کے خلاف سرگرم ہیں۔ ایسا اس لیے کرتے ہیں تاکہ انسانی حقوق کی خلاف ورزیوں جیسا جرم سبز ہلالی پرچم کے نیچے چھپ جائے۔

کراچی کے ایک اخبار سے میں وابستہ تھا۔ واقعہ بھول گیا، مگر وزیرستان میں ہوا تھا۔ طبعیت پر بہت گہرا اثر چھوڑ گیا تھا۔ فوجی آپریشن کی میں نے ایک کالم میں حمایت کی۔ عابد آفریدی نے مجھ سے کہا، آپ ایسا کیسے کرسکتے ہیں؟ اس نے بات کہی، میں نے جواب دیا۔ اس نے دلیل دی، میں چپ ہوگیا۔ میرا موقف بدل گیا۔ عابد آفریدی کے پاس محض دلیل نہیں تھی۔ ایک درد بھی تھا جس کے آگے ہردلیل ہیچ ہے۔ ایک دھماکے میں اس کا بھانجا مارا گیا۔ اس درد نے ماں کے اعصاب ایسے چٹخا دیے کہ گھر میں اسے زنجیروں سے باندھنا پڑا۔

عابد آفریدی نے جرگہ پاکستان کی بنیاد رکھی ہے۔ غرض وغایت یہ بتائی گئی ہے کہ ہم نے ریاست اور پی ٹی ایم کے بیچ تصادم کے امکانات کو ختم کرنا ہے۔ گاڑی کو دھکا دینے کے لیے سات اپریل کو اسلام آباد کے ایک مقامی ہوٹل میں فریقین کا ایک اکٹھ رکھا۔ اس اکٹھ میں ملک بھر کے مختلف الخیال دانشوروں، قلم کاروں، اخبار نویسوں اور سول سوسائٹی کے نمائندوں کو مدعو کیا گیا تھا۔ کچھ ایسے لوگ بھی آئے ہوئے تھے جنہوں نے جنگ کی شعلوں کو براہ راست سہا ہے۔ عمران فارق قتل کیس میں نامزد ملزم معظم خان کی اہلیہ بھی آئی ہوئی تھیں۔ انہوں نے اپنے تعارف میں صاف کہا، میں قائد تحریک الطاف حسین بھائی کی پیروکار ہوں۔

میں پہنچا تو اباسین یوسفزئی صاحب گفتگو فرما رہے تھے۔ آپ پختونوں کے نمائندہ شاعروں اور ممتاز اساتذہ میں سے ہیں۔ پختونخوا کے حجرہ و بازار میں جب انسانی چیتھڑے اڑ رہے ہوتے تھے تب ان کی ایک نظم کا بند زبان زد عام ہوا

ہم اس مغالطے کا شکار ہوگئے ہیں کہ حملے کے بعد نیوزی لینڈ کے معاشرے یا وہاں کی حکومت کو اسلام میں کوئی دلچسپی پیدا ہوگئی ہے۔ ایسا ہمیں اس لیے لگتا ہے کہ ہم خود کم ہی کبھی کسی معاملے کو انسانی تناظر میں دیکھ پاتے ہیں۔ سوچنے کی بات یہ ہے کہ اگر حکومت اور سوسائٹی کو اسلام سے کوئی ہمدردی تھی تو پھر ریاست یا معاشرے کو اضافی نمبر کس بات کے دیے جائیں؟ اضافی نمبر تو ہیں ہی اس بات کے کہ اسلام میں یا مسلمانوں کے کسی بھی فرقے میں کسی قسم کی کوئی دلچسپی نہ ہونے کے باوجود وہ مسلم شہریوں کے انسانی حقوق کے لیے کھڑے ہوگئے۔

اپنے رویے سے انہوں نے ثابت ہی یہ کیا ہے کہ

• ایک شہری سے مختلف سوچنا کسی بھی دوسرے شہری کا جرم نہیں ہوتا۔ اور یہ کہ تعداد میں کم ہونا کسی قانون کی خلاف ورزی نہیں ہوتی۔
• جو ہم سے مختلف سوچتا ہے اسے جینے کا اتنا ہی حق ہے جتنا کہ ہمیں ہے۔
• اقلیت اوراکثریت کوئی چیز نہیں ہوتی۔ ہوتی ہے تو صرف شہریت ہوتی ہے۔
• ریاست کی نظر میں کوئی بھی فرد مسلمان، مسیحی، ہندو یا بدھسٹ نہیں ہوتا۔ ہوتا ہے تو صرف شہری ہوتا ہے۔
• ریاست یہ نہیں جانتی کہ شہری کا کوئی عقیدہ ہوتا ہے کوئی رنگ ہوتا ہے کوئی جنس اور صنف ہوتی ہے یاپھر نظریات وافکار ہوتے ہیں۔ ہوتے ہیں تو صرف حقوق ہوتے ہیں۔

اسلام آباد میں قومی زبانوں کا ایک میلہ لگا۔ لوک ورثہ کے زارسنگہ ہال میں ”ہم کیا نہیں لکھ رہے“ کے عنوان پر محفل سجی ہوئی تھی۔ ڈاکٹر خالد سہیل میرِ محفل تھے اور شمع ان کے آگے رکھی تھی۔ گفتگو میں انہوں نے درس گاہوں کی ویرانیوں کا ماتم کیا۔ کہنے لگے، ہمارے ہاں بہت ساری فطری چیزوں کو غلط تصور کرلیا گیا ہے، اساتذہ کو چاہیے کہ وہ اس معاملے میں طلبا کی رہنمائی کریں۔ ایک کونے سے آواز آئی، ڈاکٹر خالد سہیل کی باتوں میں مت آئیے گا یہ مروانے والی باتیں کررہے ہیں، پھر بھی اگر شوق ہے تو رہنمائی سے پہلے کلاس میں نگاہ دوڑا لیں کہ کسی سٹوڈنٹ کے ہاتھ میں کیمرے والا موبائل تو نہیں ہے۔

کہنے والے نے یہ بات ازراہ تفنن کہی تھی۔ مگر اس کے پیچھے سہمی ہوئی درس گاہوں سے متعلق ایک سچائی چھپی تھی جو چالیس برس کو محیط ہے۔ زمانہ دینی مدارس کو روتا تھا یہاں عصری جامعات میں رفو کا بڑا کام نکل آیا ہے۔ لوگ حیرت کرتے ہیں مگر حیرت کا کوئی جواز نہیں ہے۔ کہنی چاہیے یا نہیں، مگر اس سچ کو لکھ دینے میں اب کوئی حرج محسوس نہیں ہوتا کہ اس معاشرے میں نفرت اور تفرقے سے وہی دور ہے جو رائج نصابِ تعلیم سے بچ کے نکل گیا۔ جو اس نصاب کا شکار ہوا اس کی سوچ میں نفرت کا زہر گھل گیا۔ یقین نہ آئے تو دیہی علاقوں پر ایک نظر ڈال لیں۔ جن علاقوں میں تعلیم پہنچ گئی ہے وہاں لوگوں نے کافر مسلمان کا فرق جان کر برتن الگ کرلیے ہیں۔ جن علاقوں تک تعلیم نہیں پہنچی وہاں تمام مذاہب ومسالک کے ماننے والے ایک ہی چشمے سے پانی بھررہے ہیں۔

دہشت گردی کو دنیا اسلام سے یا مسلمانوں سے کیوں جوڑتی ہے۔ کرائسٹ چرچ کی النور مسجد میں ہونے والے سانحے کے تناظر میں یہ سوال ترک وزیراعظم طیب اردگان نے بھی اٹھایاہے۔ امتِ مرحومہ نے اس سوال کو سراہا اور خوب سراہا۔ دیکھ لیتے ہیں کہ آخر دنیا ایسا کیوں کرتی ہے!

دنیا جانتی ہے کہ جن حالات سے کبھی ہم گزرے تھے ٹھیک انہی حالات کا سامناکبھی مغرب کو رہا۔ ہم نے بھی شہروں کے شہر اجاڑے، انہوں نے بھی کوپڑیوں کے مینار پر جھنڈے گاڑے۔ ہم نے مسلم سائنس دانوں کو قلعوں میں بند کر کے مارا، انہوں نے اٹلی کے چرچ میں کھڑا کرکے سزائے موت سنائی۔ ہم نے استنبول میں پبلشرز کے چھاپے خانے جلا کر دھواں کیے، انہوں نے پبلشرز کو برطانیہ میں سولی چڑھایا۔ انہوں نے مسلم عبادت خانوں میں اصطبل بنائے اور ہم نے کلیساوں میں قصاب خانے کھولے۔ آج دنیا دونوں میں ایک فرق دیکھ رہی ہے۔ فرق یہ ہے کہ آج اپنے ماضی پروہ شرمندہ ہیں، اپنے ماضی پرہمیں آج بھی فخر ہے۔ محض فخر ہوتا تو کچھ بات تھی، ہم تو اسی تاریخ سے استدلال کرتے ہوئے آج بھی تاریخ کو دوہراتے ہیں۔

مارچ کا مہینہ پدرسری معاشرے کے ہربرج ہرمینارے کو لرزا کے گزرگیا۔ گزر اس لیے گیا کہ آٹھ تاریخ کے سوا مارچ میں رکھا کیا ہے۔ مگراب اس تاریخ کے پہلو میں ایک لاش بھی رکھی ہے۔ افضل کوہستانی کی لاش!

افضل کوہستانی کا تعلق کوہستان کے ضلع پالس سے تھا۔ مانسہرہ میں ایک وکیل کے پاس کلرک تھا۔ ساتھ قانون کا طالب علم بھی تھا۔ وقت آیا کہ وہ کلرک رہ سکا اور نہ طالب علم۔ یہ تب ہوا جب اس نے موت کو اپنے کچھ عزیزوں کی طرف بڑھتا ہوا دیکھا۔ یہ عزیز وہی تھے جنہیں دوہزار بارہ میں کوہستان سے منظرعام پرآنے والی ایک وڈیو میں تقریبا ہر آنکھ نے دیکھا۔ یہ شادی کی ایک تقریب کی گھریلو سی وڈیو تھی۔ جس میں چار لڑکیاں تالیاں پیٹ رہی تھیں اور دو لڑکے روایتی رقص کررہے تھے۔ وڈیو منظر عام پر آئی تو کوہستان میں ثناخوانِ تقدیس مشرق نے سوال اٹھائے۔ افضل کوہستانی جانتا تھا کہ جو ”جرم“ منظر عام پر آیا ہے اس کی سزا قتل کے سوا کچھ نہیں ہے۔

پی ٹی ایم کے پشاور جلسے میں پہلی بار ڑوانگہ لونی کا نام سنا۔ وہ کوئٹہ کی نمائندگی کررہی تھی۔ بتایا گیا کہ اس کا تعلق ضلع سنجاوی زیارت سے ہے۔ پانچ منٹ کا اس نے خطاب کیا۔ سامعین کو ایک آنکھ ہنسایا اور ایک آنکھ رلایا۔ دوسری بار اسے کراچی جلسے میں دیکھا۔ وہ ثنا اعجاز کے ساتھ پنڈال کا جائزہ لے رہی تھی۔ میں نے علی ارقم سے کہا، اس بات نے قدرے حیرت میں مبتلا کیا ہوا ہے کہ جس قبیلے میں عورت کا روشن دان سے سر نکالنا قیامت ہے اس قبیلے کی لڑکی عقیدوں اور یقینوں سے نکل کر کیسے سوچ رہی ہے۔ سوچ ہی نہیں رہی بلکہ عملی طور پر میدان میں موجود بھی ہے۔ علی ارقم نے تفصیلی جواب دینے کی بجائے اتنا کہا، یہ ارمان لونی کی بہن ہے!

کچھ برس قبل حسنین جمال کی پابند نظم جیسی مقفہ و مسجع داڑھی نے بہت متاثر کیا۔ کم اب بھی نہیں ہے مگر اب میر کے مصرعوں جیسی وہ تراش نہیں رہی۔ اب تو یا عبدالحلیم شرر کی آزاد نظم جیسی ہوتی ہے یا اگر وزن میں ہو تو جاوید اختر کی طرح لمبی بحروں میں ہوتی ہے۔ شاید چیخوف کی پیروی سے چھوڑ کر گرو رجنیش اوشو کی اتباع میں آگئے ہیں۔ فریڈرک اینگلزاور سگمنڈ فرائیڈ کی داڑھیوں پر بھی عین یہی ادوار گزرے تھے۔ یعنی بڑے لوگوں کے خیالات ہی نہیں ملتے، داڑھیاں بھی بہت ملتی ہیں۔

حسنین کو دیکھ کر بجا طور پر اندازہ ہوا کہ بال وپر سنوارنے کے اچھے برے سبھی مراکز کا انہیں کو علم ہوگا۔ تقریبا التجا کردی کہ بھائی کوئی ڈھنگ کا بندہ بتادو جو ڈھب کی حجامت ہی کردیا کرے۔ تھک ہار گیا ہوں مگر اسلام آبادمیں کوئی ملا ہی نہیں جو داڑھی مونچھ کے قافیہ ردیف سنوار دے۔ جب بھی ملا کوئی غیر موزوں قینچی گزار ہی ملا۔

بنی نوع انسان کی تاریخ ہمیں یہ تو بتاتی ہے کہ سوال اٹھانے والوں پہ عرصہ حیات تنگ کیا گیا، مگر تاریخ ایسی ایک بھی مثال دینے سے عاجز ہے جس میں سوال کو گلا گھونٹ کے ماردیا گیا ہو۔ بات یہ ہے کہ۔!! وہ میزائل ابھی ایجاد نہیں ہوا جو سوال تک مار کرنے کی صلاحیت رکھتا ہو۔ وہ گولی ابھی تخلیق ہونا رہتی ہے جو سوال کے بھیجے میں اتر سکے۔ خنجر کی وہ دھار اب تک مجہول

اسے ذوالفقار علی بھٹو کی جیت سے تشبیہہ اس لیے نہیں دینا چاہیے کہ ریاستی بندوبست بھٹو کے ساتھ نہیں، ان کے مخالفین کے ساتھ کھڑا تھا۔ انتخابات میں قرعہ فال عمران خان صاحب کے نام نکلا ہے، اگلے پانچ برس بغیر کسی چوں کے اور بغیر کسی چراں کے ان کا استحقاق ہونا چاہیے۔ اگر کسی جماعت کو انتخابات کی شفافیت پر سوال ہے تو ضرور سوال اٹھانا چاہیے مگر اس کی بنیاد پر ستتر جیسی یا ماضی قریب

جبران ناصر جیتے گا یا نہیں، کچھ کہا نہیں جاسکتا۔ یہ بات تو پکی ہے کہ جوان ہارے گا نہیں۔ پاکستان ایسے دور میں داخل ہوچکا ہے جہاں جیتنے والے اور نہ ہارنے والے دوبدو ہوگئے ہیں۔ جیتنے والے وہ ہیں جو عوام کا فیصلہ نہیں مانتے۔ نہ ہارنے والے وہ ہیں جوعوام کے فیصلے کو مسترد کرنے کا فیصلہ نہیں مانتے۔ جنہیں عوام کا فیصلہ قبول نہیں، وہ جبر کو طاقت کا سرچشمہ سمجھتے ہیں۔ جو جبر کے فیصلے

پختونخوا میں انتخابی معرکہ سر کرنے کے بعد کپتان کو ایک موقع ملا۔ اپنے عزم کو ثابت کرنے کا۔ اپنے تجربے کی آرائش کرنے کا۔ کپتان نے مگر گھاٹے کا سودا کیا۔ انہوں نے طے کیا کہ اگلے انتخابات میں بھی اپنی خوبیوں کے ساتھ نہیں جانا۔ دوسروں کی خامیاں مجھے کافی رہیں گی۔ سارے ہنر پنجاب پر آزما دیے اور پختونخوا کو جتنا ممکن ہوسکا نظر انداز کردیا۔ سیاسیات کا کوئی طالب علم خان صاحب کی پانچ برسوں کی

حامد میر صاحب ان لوگوں میں سے ایک ہیں جنہیں انیس سوننانوے میں منتخب عوامی حکومت کے خاتمے پر سجدہ شکر بجالانے کی توفیق ہوئی تھی۔ وہ چند گداگرانِ سخن جو اپنا ہنر ایک آمر کی ذات والا صفات پر وارنے نکلے تھے، حامد میر ان میں سے ایک تھے۔ مجھ جیسے نو بالغ حامد میر کو اس لیے پڑھاکرتے تھے کہ وہ اپنے کالم میں بتایا کرتے تھے کہ سابق وزیراعظم کی پھانسی میں کتنے دن رہ گئے۔انہی کے

مارٹن کوبلر جرمن سفیر ہیں جو پاکستان میں تعینات ہیں۔ یہ سفارت کاری کی بہت خوشگوار جہتیں متعارف کروا رہے ہیں۔ سنی سنائی سے سے زیادہ وہ دیکھی دکھائی پر بھروسہ کررہے ہیں۔ پاکستان کی ثقافتی اور ادبی سرگرمیوں میں ایک عام سامع کی طرح شرکت کرتے ہیں۔ عوامی مقامات پر جا کر روایات و اقدار کا جائزہ لیتے ہیں۔ لوگوں میں گھل مل کرتہذیب و تمدن کا مشاہدہ کرتے ہیں۔ روایتی پکوانوں اور مشروبات کا لطف لیتے ہیں۔ یہاں

گزشتہ صدی کے وسط میں ہمیں فیدل کاسترو کی "تحریک ِ چھبیس جولائی” جیسی ایک تاریخی تحریک ملتی ہے۔ چی گویرا نے اپنی عملی اور انقلابی زندگی کا آغاز اسی تحریک سے کیا تھا۔ یہ ایک مسلح تحریک تھی جس کی بنیاد کیوبا کے آمر بتیستا کے جبر کے خلاف پڑی تھی۔ اس تحریک کا نام بارہ سو لڑاکوں کا فیدل کاسترو کی سالاری میں مونکاڈا کیمپ پر پہلے حملے کی تاریخ کی نسبت سے پڑا۔ اسی حملے کے نتیجے

طیب ایردگان جیت گئے۔ یہ عوام کا فیصلہ ہے اور عوام نے یہ فیصلہ ناقابل یقن رفتار سے ہونے والی معاشی و اقتصادی ترقیوں کی بنیاد پر کیا ہے۔ پاکستان میں ایک بڑا طبقہ ایردگان کی جیت پر خوش ہے۔ اپنے اپنے دائرے میں سب کی خوشی سمجھ آرہی ہے، مگر صلحائے پاکستان کی خوشی اب تک میری سمجھ سے باہر ہے۔ یہ خوشی تب اور بھی سمجھ سے باہر ہوجاتی ہے جب صالحین کہتے ہیں کہ یہ پولیٹیکل اسلام

ذوالفقار علی بھٹو کو کوئے یار سے سوئے دار تک پہنچانے میں احمد رضا قصوری کی مدعیت اور ائیر مارشل اصغرخان کی تحریک کا کردار اہم تھا۔ ائیر مارشل نے تخت ِ اقتدار الٹنے کا جواز مہیا کیا اور قصوری صاحب نے تختہِ دار کھینچنے کے لیے اپنی صلاحیتیں فراہم کیں۔ بھٹو صاحب کو پھانسی ہوگئی تو احمد رضا قصوری ایڑیاں اٹھا اٹھا کے شہر میں چلنے لگے۔ جس کسی کے مزاج میں وہ اکڑ دیکھتے تو کہتے ”میں نے

ہمارا گھرانہ جدی پشتی سنی العقیدہ ہے۔ اسی کی دہائی میں والدین کراچی کے علاقے ناظم آباد منتقل ہوئے۔ محلہ عثمانیہ سوسائٹی میں ہم نے آنکھ کھولی، دودھ کے دانت توڑے اور یہیں عقل داڑھ نکلی۔ عثمانیہ سوسائٹی رضویہ سائٹی کے شانہ بشانہ ہے۔ رضویہ سوسائٹی میں شیعہ ہم وطن آباد ہیں۔ میں نے ہندوستان کا شہر امروہہ نہیں دیکھا۔ مگر مجھے لگتا ہے میں نے امروہہ دیکھا ہے۔ امروہہ سے ہجرت کرکے آنے والے اہل علم کا ایک نفیس