پاکستان سے گھر لوٹے تیسرا دن ہے۔ اب گھر کی تعریف بھی بدل چکی ہے۔ انسان بھی عجیب چیز ہے۔ جس کھاٹ اور تکیے کا عادی ہو جائے اسی کو گھر کہنے لگتا ہے۔ وہاں سردی سے ٹھٹھر رہے تھے اور یہاں آسٹریلیا میں گرمی میں جھلس رہے ہیں۔ لیکن ہوا صاف بھی ہے اور آزاد بھی۔ عجیب بات ہے نا کہ جشن آزادی پر پاکستان میں کیا کچھ پٹاخے نہیں پھوڑے جاتے۔ ملی نغمے ہر طرف بجائے جاتے ہیں۔ لیکن آزادی کیا ہے؟ واللہ اعلم۔

بہت عرصہ پہلے کی بات ہے جب ہم یونیورسٹی کی ایک اسائنمنٹ کے بہانے لوہاری دروازے گئے۔ جی، بہانہ ہی تھا ورنہ عمر کے اس حصے میں کون کافر ریسرچ کا شوق لے کر بیٹھے تھا۔ لاہور شہر میں اپنائیت کا یہ عالم ہے کہ ہم لوگ یہ نہیں دیکھتے کہ سامنے کون بیٹھا ہے۔…

ایک بات بتائیے۔ آپ کا حافظہ کیسا ہے؟ کیا آپ کو اپنے بچپن میں پہنی جانے والی فراک اور دس محرم پر پی ٹی وی پر لگنے والی شام غریباں یاد ہے؟ کیا آپ کو گرمیوں کی وہ تپتی دوپہر یاد ہے جب آپ کی امی کی قمیض روٹیاں بناتے ہوئے پسینے سے شرابور ہو چکی تھی؟ کیا آپ کو اپنے ہمسائے میں رہنے والے وہ دو ننھے بھائی یاد ہیں جو ہر آتے جاتے کو سلام کی گردان سناتے تھے؟ اگر آپ کو یہ یاد نہیں تو کچھ بھی یاد نہیں۔

ہمیشہ کوشش کی ہے کہ ہر موضوع پر لکھا جائے کہیں کچھ موضوعات سے دور رہا جائے۔ کل ہی کی بات ہے کہ ہماری امی نے مشورہ دیا کہ غیرت کے نام پر قتل پر کالم لکھا جائے۔ ہم نے اپنے ہی گاؤں میں ہونے والے ایک ایسے واقعے کا ذکر کیا تو فوراً بولیں کہ مت لکھنا۔ لیکن ہمیں لگتا ہے کہ ایک بے گناہ جان کا ہم پر قرض ہے جو لفظوں سے اتارنا لازمی ہے۔ لیکن کچھ بے گناہ جانوں کا قرض ایسا ہے جو شاید اپنی جان سے اتارنا پڑے۔ اسی لئے ہم کیا سب ہی ہونٹ سیے بیٹھے رہتے ہیں۔

مقروض ہونا بڑی مشکل کیفیت ہے۔ پتہ نہیں وہ کون لوگ ہوتے ہیں جن کے دل پہ قرضے کا بوجھ نہیں ہوتا۔ آرام سے زنگی گزارے چلے جاتے ہیں۔ ہمیں تو کل رات نیند ہی نہ آئی۔ کبھی لگتا کہ گرمی زیا دہ ہے۔ کبھی جسم ٹھٹھرنے لگتا۔ کاندھوں اور سر پر ایک عجیب سا بوجھ تھا جیسے کسی نے منوں وزن لاد دیا ہو۔ انسان اپنی کیفیت اچھی طرح سمجھتا ہے۔ ہمیں بھی سمجھ آ رہی تھی لیکن کوشش یہی تھی کہ آنکھ لگ جائے۔ کچھ ایسا لگنے لگے جیسے کبھی کچھ ہوا ہی نہیں تھا۔

اب ہم نے پرانی عادتیں چھوڑ دی ہیں کہ کہیں بھی جاتے ہی اپنا کالا سوٹ کیس کھول دیا۔ اب تو ہم سامان کو سوٹ کیس میں ہی رہنے دیتے ہیں۔  اسی سے قمیض نکالی۔ جھاڑ کر سیدھی کی۔ پہن کر سوٹ کیس میں سے ہی میک اپ باکس نکالا۔ لپ اسٹک کو ہونٹوں پر جمایا۔ واپس میک اپ باکس میں ڈالا۔ اس لال ڈبے کو واپس سوٹ کیس میں ڈالا اور اپنی راہ لگ لیے۔  یہی سوٹ کیس اپنا گھر لگتا ہے۔  بس یہی اپنا ہے۔  بس یہی دائمی ہے۔ 

کل رات تک ورلڈ کپ کا دور دورہ تھا۔ تھا اس لئے کہ پانچ سو رنز کا خواب پورا نہ ہو پایا۔ کچھ اغیار کی سازشوں نے بھی مارا۔ جب پتہ تھا کہ ہمیں ان کی اچھی گیم کی ضرورت تھی تو ڈھنگ سے کیوں نہیں کھیلے؟ ان کے ہاتھوں میں مہندی لگی تھی کیا؟ سارا ورلڈ کپ ہی فکسڈ تھا۔ ان کافروں کو بھی اچھا کھیلنا تب ہی یاد آتا ہے جب ہمارے مد مقابل ہوں۔ ایک دوسرے کے سامنے تو فتح میں یوں تہذیب دکھاتے ہیں کہ جیسے کھانے کی لمبی آبنوسی میز پر سب بیٹھے ہوں۔ سب کے پیٹ میں چوہے دوڑ رہے ہوں۔ لیکن پندرہ منٹ اسی تکرار میں گزر جائیں کہ پہلے آپ۔ جی نہیں، پہلے آپ۔ ہر کوئی اسی کوشش میں سرگرداں ہوتا ہے کہ دوسرا ہی بھنے قورمے سے ٹانگ کی بوٹی اٹھائے۔