آج کل ایک سازش کی وجہ سے یہ روش چل پڑی ہے کہ تحریک انصاف کی حکومت کی ہر ناکامی کا سبب یہ بتایا جانے لگا ہے کہ عثمان بزدار پنجاب کے وزیراعلیٰ ہیں اور جیسے ہی ان کی جگہ کسی اہل شخص کو وزیراعلٰی پنجاب بنا دیا گیا تو بی آر بی میں دودھ اور لاہور کے بیچوں بیچ گزرتی میاں میر نہر میں شہد بہنے لگے گا۔ کوئی پوچھے عثمان بزدار کو آپ نے اختیار کیا دیا ہے جو ان سے پرفارمنس مانگی جا رہی ہے؟ شہنشاہ ہند شاہ عالم ثانی کو کسی شاعر نے یہ کہہ کر بدنام کر ڈالا تھا کہ ”حکومت شاہ عالم، از دہلی تا پالم“۔ عثمان بزدار کا معاملہ تو اس سے بھی گیا گزرا ہے۔ ان کا اختیار تو لاہور تا شاہدرہ بھی نہیں ہے۔

آپ نے پچھلے دنوں زینب قتل کیس کے سلسلے میں ڈارک ویب، ڈارک نیٹ اور ڈیپ ویب کی اصطلاحات سنی ہوں گی کہ کیسے ان پر ایک غیر قانونی مارکیٹ چلتی ہے۔ ڈارک نیٹ پر بچوں کی فحش ویڈیوز سے لے کر منشیات اور کرائے کا قاتل تک دستیاب ہے۔ سوشل میڈیا پر موجود ماہرین کی جانب سے ان جرائم کا بتا کر بے حد درد مندی سے یہ مطالبہ کیا گیا ہے کہ انٹرنیٹ پر موجود ان تاریک چیزوں پر پابندی لگائی جائے اور انٹرنیٹ کا 90 فیصد مواد ڈارک نیٹ کی ٹریفک پر مشتمل ہے۔ آپ شاید یہ سمجھتے ہوں گے کہ ان ٹیکنالوجیز سے آپ محفوظ ہیں۔ ایسا نہیں ہے۔ یہ آپ کے ارد گرد موجود ہیں اور آپ کی زندگی پر اثر انداز ہو رہی ہیں مگر آپ ان سے واقف نہیں ہیں۔ آئیے ان ٹیکنالوجیز کے بارے میں کچھ جاننے کی کوشش کرتے ہیں۔

ملک نیمروز پہاڑوں کی ترائی میں واقعہ ہے۔ پہاڑوں پر گھنے جنگل ہیں جن میں ہاتھی، گینڈے، گھوڑے، بھیڑیے، بھیڑیں اور دیگر جانور بکثرت پائے جاتے ہیں۔ شہر نیمروز پر ایک خدا ترس بادشاہ کی حکومت تھی جس کے انصاف کا ایسا شہرہ تھا کہ لوگ نوشیرواں کی بجائے اس کی مثالیں دیا کرتے تھے۔

پر قسمت کا چکر تو کسی لمحے بھی الٹا چل سکتا ہے۔ یہی نیمروز کے ساتھ ہوا۔ اس کو کسی کی نظر لگ گئی۔ ایک آدم خور شیر وہاں آ گیا۔ صبح، دوپہر شام جس وقت اسے بھوک لگتی وہ جنگل سے شہر میں آ جاتا اور اپنی بھوک مٹاتا۔ اس شیر کے بارے میں ایک چیز عجیب تھی۔ وہ صرف عورتوں کو شکار بنتا تھا، مردوں کو اگر وہ صرف اسی وقت مارتا جب وہ کسی عورت کا شکار کرنے میں اس کے خلاف مزاحمت کرتے۔

ہر ذی شعور شخص کی امیدیں کپتان سے وابستہ تھیں کہ نا اہل سیاست دانوں کی کرپشن سے وہ نجات دلائے گا۔ سب پر واضح تھا کہ اوپر اگر اچھا حکمران ہو تو نیچے ماتحت خود بخود ٹھیک ہو جاتے ہیں۔ اسے ٹاپ ڈاؤن ماڈل کہتے ہیں۔ آکسفورڈ کا پڑھا کپتان جو ساری زندگی برطانوی اشرافیہ میں گزار چکا ہے، بارہا بتا چکا ہے کہ برطانیہ میں ایسا ہی ہوتا ہے۔

لیکن کپتان جیسے صاف ستھرے، اولوالعزم، صاحب بصیرت وژنری لیڈر کی حکومت میں صورت حال بہتر ہونے کی بجائے کرپٹ حکمرانوں کے دور سے بھی بدتر ہو گئی۔ کاروبار تباہ ہوئے گئے، ملازمتیں چلی گئیں، بجلی گیس کے بل دگنے مہنگے ہو گئے، گاڑیوں کی صنعت برباد ہو گئی، رئیل اسٹیٹ اور تعمیرات کا شعبہ مٹی میں مل گیا۔ اس کی کیا وجہ ہے؟ وقت آ گیا ہے کہ یہ راز کھول دیا جائے کہ اس کی وجہ ایک بھیانک سازش ہے۔

اب لوگ معیشت کے بارے میں الٹی سیدھی باتیں کر رہے ہیں۔ حالانکہ کپتان نے حکومت میں آتے ہی قوم کو کہہ دیا تھا کہ گھبرانا نہیں، کچھ عرصے مشکل ہو گی، پھر سب ٹھیک ہو جائے گا اور ملک کی ترقی کا سفر تیز رفتاری سے شروع ہو جائے گا۔

جہاں تک ترقی کے تیز تر سفر کی بات ہے تو اس طریقۂ سفر کی مثال ہم جہاز سے دیتے ہیں۔ آپ نے جہاز میں سفر کیا ہو تو آپ نے نوٹ کیا ہو گا کہ مسافر بٹھا کر جہاز آہستہ آہستہ رن وے کی طرف جاتا ہے۔ پھر جہاز اپنے متعین کردہ مقام پر جا کر رکتا ہے، انجن مدھم پڑ جاتے ہیں، کپتان فل بریک لگاتا ہے اور پھر جہاز کو خوب ریس دیتا ہے اور جب انجنوں کی چیخیں نکلنے لگتی ہیں تو کپتان بریک سے پاؤں اٹھا لیتا ہے اور یکلخت ایک زوردار جھٹکے سے جہاز آگے بڑھتا ہے اور ٹیک آف کر جاتا ہے۔

بھارتی نمبر ون خلائی ادارہ اسرو مشن چاند پر جہاز نہیں اتار سکا۔ کام بھی تو اس نے عجیب کیا تھا۔ کامن سینس کی بات ہے کہ کسی نئی جگہ پر جانا ہو تو آدمی دن کے وقت جانے کی کوشش کرتا ہے تاکہ روشنی میں خوب دیکھ بھال لے ورنہ راستہ بھول جاتا ہے۔ اندھیرے کی وجہ سے نہ صرف گھنٹوں مارے مارے پھرنا پڑ سکتا ہے بلکہ آدمی ٹھوکر بھی کھا سکتا ہے۔ اور اگر یہ تاریک راستہ پاکستان ہندوستان کا ہو، تو غالب امکان ہوتا ہے کہ بندہ تاریکی کے باعث کسی کھلے گٹر میں گر جائے جس کا ڈھکن کوئی جہاز اڑا لے گیا ہو۔

لاہور کے علاقے گلشن راوی کے امیرکن لائسٹف سکول میں ایک استاد نے دسویں کلاس کے بچے حنین بلال کو سبق نا یاد کرنے پر اس کا سر دیوار سے ٹکرا کر اسے مار ڈالا۔ بظاہر یہ نہایت ظلم کی بات لگتی ہے۔ عینی شاہدین بچوں کے بیانات کو سنیں تو لگتا ہے کہ استاد نے بہت ظلم کیا۔ لیکن استاد ظلم کہاں کرتے ہیں۔ وہ تو یہ سب کچھ بچوں کی بھلائی کے لئے کرتے ہیں۔ اسی وجہ سے حکومت بھی اس کارِ خیر کو روکنے کی کوئی خاص کوشش نہیں کرتی۔ اس قتل میں بھی مقتول کی بھلائی ہو گی۔ عینی شاہد طالب علم کے بیان کی روشنی میں صورت حال کچھ یوں بنتی ہے۔

کراچی سے پشاور تک ڈینگی نے دوبارہ حملہ کر دیا ہے۔ بیماری کا سب سے زیادہ زور دو شہروں میں ہے، راولپنڈی اور پشاور۔ گزشتہ ایک ماہ میں راولپنڈی میں ڈینگی کے مریضوں کی تعداد ایک ہزار سے زیادہ ہو گئی ہے اور پشاور میں بارہ سو سے سے زیادہ۔ لاہور میں بھی ڈینگی شرارت پر تلا ہوا ہے اور اس نے دیگر افراد کے علاوہ قذافی سٹیڈیم میں شاہین آفریدی پر حملہ کر دیا ہے اور وہ تین ہفتے کرکٹ سے دور رہیں گے۔ کراچی میں ہاکس بے میں قائم اٹامک انرجی پلانٹ پر چینی کام کررہے تھے جن میں سے دو سو ڈینگی کا نشانہ بنے۔

جب کپتان وزیر اعظم بننے کی جد و جہد کر رہا تھا، اسی وقت اس کی راہ میں کانٹے بچھائے گئے تھے اور سب کو پتہ چل گیا تھا کہ گاڑی میں پینتیس پنکچر کر کے کپتان کا راستہ روکا گیا ہے۔ گو بعد میں عدالت میں کپتان نے اس بات کو سنی سنائی کہہ کر ٹال دیا تھا مگر ساری قوم کا دل جانتا ہے کہ بات سنی سنائی نہیں سچ تھی، کپتان کی انتخابی گاڑی کو پنکچر کیا گیا تھا۔

جب نواز شریف کے خلاف ابھی کام نہیں اٹھا تھا تو اس وقت سہیل وڑائچ نے کالم لکھا تھا ”دی پارٹی از اوور“۔ 22 جون 2017 کو لکھے گئے اس کالم میں سہیل وڑائچ نے کہا تھا کہ ”موجودہ وزیراعظم نواز شریف کے لئے ’پارٹی اِز اوور“ کی آواز لگ چکی ہے۔ سکرپٹ میں کوئی تبدیلی نہ آئی تو جولائی اور اگست میں آخری رسومات ہوں گ ”۔ میڈیا، عوام اور نون لیگ میں اس کالم کا مضحکہ اڑایا گیا تھا مگر جب 28 جولائی 2017 کو نواز شریف کی وزارت عظمیٰ کا بستر گول کر دیا گیا تو سہیل وڑائچ کو متفقہ طور پر غیب کی خبریں لانے والا میڈیائی ولی اللہ مان لیا گیا۔

اب وہی سہیل وڑائچ اپنے آج 3 ستمبر 2019 کے کالم ”اڑیل ہے ٹٹو۔ ۔ ۔ “ میں فرماتے ہیں کہ عثمان بزدار کا بستر بھی گول کرنے کی تیاریاں ہیں اور متبادل نام آ رہے ہیں۔

نئی نویلی دلہن کی کیفیت عجیب اور جذبہ بے پناہ ہوتا ہے جو اپنی شادی ہوتے ہی اپنے میاں کے تمام کنوارے دوستوں اور کزنوں کی اپنی سہیلیوں اور کزنوں سے شادی کروانے کو بے چین ہو جاتی ہے۔ آگہی کا سرور بھی بے پناہ ہوتا ہے۔ علامہ اقبال نے تین چار شادیاں اور اتنے ہی عشق کیے تھے۔ غالباً اسی لئے وہ محرم راز ہوئے اور انہوں نے دلہناپے کی اس کیفیت کو کچھ یوں بیان فرمایا

دو عالم سے کرتی ہے بیگانہ دل کو
عجب چیز ہے لذّتِ آشنائی

کہنے کو تو شفیق الرحمان نے پیروڈی لکھی ہے مگر ”مزید حماقتیں“ کے مضمون ”تزک نادری“ کو ہم تاریخ کی بہت سی کتابوں سے زیادہ معتبر جانتے ہیں۔ نادر شاہ افشار کا لشکر دہلی کی طرف بڑھ رہا تھا اور تخت دہلی عیش و عشرت میں مصروف تھا۔ تزک نادری یہ معاملہ کچھ یوں بیان کرتی ہے۔

”محمد شاہ کو ہماری تشریف آوری کا علم ہو چکا تھا۔ ایک مرتبہ تو اس نے ایلچی کو خط اور لفافے سمیت شراب کے مٹکے میں دھکیل دیا اور بولا ’ایں ایلچی بے معنی غرق مے ناب اولٰی‘۔ کسی طبلچی نے حافظ کا یہ مصرعہ صحیح کرنا چاہا تو محمد شاہ نے اسے بھی مٹکے میں دھکیل دیا۔ آدمی با مذاق معلوم ہوتا ہے“۔

کشمیر پر مسلم ممالک کی خاموشی پر بعض لوگ ”حیران ہیں، لب بستہ ہیں، دلگیر ہیں“ اور سوچ رہے ہیں کہ ”یاد آئے ہیں جب بھی غم و آلام ہی آئے“۔ کیا وجہ ہے کہ پاکستانی تو ہمیشہ برما سے لے کر فلسطین اور بوسنیا سے لے کر عراق تک امت کے ہر چھوٹے بڑے معاملے پر اپنے اپنے شہر کے ٹریفک سگنل توڑتے آئے ہیں مگر دیگر مسلم ممالک نے کبھی کشمیر پر پاکستان کا ایسا ساتھ نہیں دیا۔ لے دے کر ایک ترکی ہی بولتا ہے دوجا کون ہے؟ فلسطینی تک پاکستان کے مقابلے میں بھارت کا ساتھ دیتے رہے ہیں۔ مانا کہ جنرل ضیا الحق نے چند ہزار فلسطینی مار ڈالے تھے مگر اس کا یہ مطلب تو نہیں کہ وہ کشمیر پر ہماری ویسے حمایت نہ کریں جیسے ہم اسرائیل کے خلاف ان کی کرتے ہیں۔

اسلام آباد میں حکم جاری کیا گیا ہے کہ کل بارہ بجے سے لے کر ساڑھے بارہ بجے تک تمام ٹریفک سگنل سرخ رہیں گے۔ اسلام آباد کے تمام شہری کشمیریوں سے اظہار یکجہتی کے آدھا گھنٹہ ٹریفک سگنل پر کھڑے ہوں گے۔ ہمیں یقین ہے کہ قوم آدھا گھنٹہ تو صرف وزیراعظم کی اپیل پر کھڑی ہو گی، اور اس دوران اتنا زیادہ جوش اور جذبہ شہر کی سڑکوں پر موجزن ہو جائے گا کہ شام تک ویسے ہی سڑک پر کھڑی رہے گی۔

یہ تحریر ذی شعور متفکر عاقل بالغ والدین کے لئے ہے، ننھے منے معصوم بچوں کو اس سے دور رکھا جائے تو مناسب ہو گا۔
آج صبح ایک پوسٹ نظر سے گزری۔ اس میں قوم، ملت، امت اور نئی نسل کا شدید درد رکھنے والے ایک بھائی صاحب نے سب کو خبردار کیا تھا کہ بہت ہی ننھے منے بچوں کو دکھائے جانے والے کارٹون نہایت تشویشناک ہیں اور ہمیں ذرا بھی احساس ہی نہیں کہ ہم اپنے بچوں کے ہاتھوں میں کیسی برائی دیے ہوئے ہیں۔ انہیں اس کارٹون کے الفاظ میں تو کئی غلط بات دکھائی نہیں دی مگر اس میں دکھائی جانے والی بوتل کی شکل ان کی رائے میں نہایت ہی بالغانہ اور مردانہ تھی۔

ہمیں ایک طویل عرصے سے یہ بتایا جا رہا ہے کہ ہماری خارجہ پالیسی میں اولین اہمیت مسلم ممالک کو حاصل ہے۔ یہ پالیسی اس وقت تک درست تھی جب تک ہمیں انڈیا کے مقابلے میں عرب ممالک اور ایران کی غیر مشروط حمایت حاصل تھی۔ مگر سردار من موہن سنگھ کے انڈیا کو ایک بڑی معاشی طاقت بنانے کے بعد جب نریندر مودی نے خارجہ محاذ پر اس طاقت کا فائدہ اٹھانا شروع کیا تو یہ سب ممالک ہمیں چھوڑ کر انڈیا کے ساتھ ہو گئے۔ ابھی چند ہفتے پہلے انڈیا نے کشمیر کے زخم کو ہرا کیا ہے اور ادھر مسلسل کرفیو اور کریک ڈاؤن چل رہا ہے، اور ایسے میں امارات کی جانب سے مودی کو اپنا سب سے بڑا اعزاز دیا جانا اس زخم پر نمک چھڑکنے جیسا ہے۔

آج سوشل میڈیا پر آگ لگی ہوئی ہے۔ لاہور میں پورے شہر کو آپس میں ملانے والی مرکزی سڑک نہر کے کنارے کنارے چلتی ہے اور اس پر بے شمار انڈر پاس بنے ہوئے ہیں۔ ان میں یونیورسٹی کے نیو کیمپس کے انڈر پاس کا نام ”وارث میر انڈر پاس“ رکھا گیا تھا۔ آج اچانک اس کا نام ”نیو کیمپس (کشمیر) انڈرپاس“ رکھ دیا گیا تو یہ کہا جانے لگا ہے کہ وزیراعظم نے حامد میر سے کوئی دشمنی نکالی ہے۔ ہماری رائے میں یہ بات غلط ہے۔

پرانے حکیموں کے بیان کردہ کئی قصے کہانیاں بہت دلچسپ ہوتے ہیں۔ بیوروکریسی اور کارکردگی کے بار ے میں کسی ولایتی حکیم نے ایک کہانی بیان کی ہے جسے حسب معمول ہم تحریف و تخریب کے ساتھ پیش کرتے ہیں۔

روایت ہے کہ ایک جنگل میں شیر چیف ایگزیکٹو تھا۔ ادھر ایک ننھی سی چیونٹی محنت مزدوری کیا کرتی تھی۔ صبح سویرے وہ ہنستی گاتی کام پر آتی اور فوراً کام پر لگ جاتی اور ڈھیر سا کام نمٹا دیتی۔ شیر یہ دیکھ کر حیران رہ گیا کہ چیونٹی کسی قسم کی نگرانی اور راہنمائی کے بغیر اتنا زیادہ کام کر رہی ہے اور پیداوار کے ڈھیر لگائے کھڑی ہے حالانکہ اسے بہت واجبی سی تنخواہ ملتی تھی۔ اس نے سوچا کہ اگر چیونٹی کسی قسم کی نگرانی کے بغیر اتنا کام کر رہی ہے تو اس کے سر پر ایک سپروائزر مقرر کر دیا جائے تو پھر وہ کتنا زیادہ کام کرے گی۔

کہتے ہیں کہ پرانے وقتوں میں چار دوست ہوا کرتے تھے۔ تین دوست نہایت پڑھے لکھے تھے۔ ایک جین مت کا گیانی تھا۔ دوسرا بدھ جوگی تھا۔ تیسرا ہندو اچاریہ تھا۔ تینوں پنڈتوں نے اپنے مذہب کی کتابوں، جاپوں اور منتروں میں کمال پایا تھا۔ اشلوک پڑھ کر کچھ کا کچھ کر دیتے تھے۔ لیکن دنیاوی معاملات میں ذرا بھگوان لوک تھے۔ ان کا چوتھا دوست نرا جاہل تھا۔ لیکن بہت بدھی مان تھا۔ عقل سلیم خوب رکھتا تھا۔ تو ہوا یہ کہ تینوں نے ایک دن یہ فیصلہ کیا کہ یہاں ہماری تو کوئی قدر کرتا نہیں ہے۔ ایسے علم کا کیا فائدہ جس سے مال دولت نہ ملے۔ ایسا کرتے ہیں کہ کسی بڑے شہر چلتے ہیں۔ وہاں راجے مہاراجے ہمیں ملیں گے تو ہمارا علم دیکھ کر دربار میں ہمیں اونچی جگہ دیں گے۔ جو کچھ ملے گا وہ آپس میں برابر تقسیم کر لیں گے۔ وہ سامان باندھ کر چلنے کو تیار ہوئے تو چوتھے نے کہا کہ میں بھی چلتا ہوں۔ یہاں تو میرا کچھ نہیں بنتا، بڑے شہر جا کر شاید میرا بھی کچھ بن جائے۔ دو ٹکڑے روٹی کے مل جائیں گے۔

کراچی سے خبر آئی ہے کہ ادھر درجن بھر نہایت ہی نیک دل لوگوں نے جو معاشرے میں کوئی برائی برداشت کرنے کے روادار نہیں ہیں، ایک بچے کو چور پا کر مار ڈالا۔ انہوں نے باقی تمام بچوں، بڑوں اور چوروں کو عبرت دلانے کے لئے اس قتل کی ویڈیو بھی سوشل میڈیا پر ڈال دی۔ اچھا ہوا چور مار ڈالا، سب چوروں کا ٹائم آئے گا، اب آپ زیادہ سے زیادہ یہ کہہ سکتے ہیں کہ ان کی نیت نیک تھی بس طریقہ غلط تھا۔ ورنہ ایسا کہنے کی بھی چنداں ضرورت نہیں ہے۔

ہمیں ویڈیو دیکھنے کا اتفاق نہیں ہوا کیونکہ طبعاً بزدل اور رقیق القلب ہونے کی وجہ سے ہم ایسی ویڈیوز نہیں دیکھتے۔ ہاں جنہوں نے دیکھی ہے وہ بتاتے ہیں کہ چور کو گرل سے باندھ کر ڈنڈوں سے مارا گیا۔ ایسا نہیں کہ ادھر سب ظالم اکٹھے ہو گئے تھے۔ ایک صاحب کے بارے میں بتایا جاتا تھا کہ وہ منع کرتے رہے کہ ڈنڈا سر پر مت مارو کہیں بچہ مر نہ جائے۔ بچے کی پینٹ اتارنے کا معاملہ ابھی تحقیق طلب ہے۔ شاید اگست کے احترام میں ایسا کیا گیا ہو۔ منٹو وغیرہ بتاتے ہیں کہ اگست 1947 میں شلوار پاجامہ اتارنے کے بعد ہی فیصلہ کیا جاتا تھا کہ بندہ نیک ہے یا واجب القتل۔ شاید یہ لوگ بھی ویسی ہی تحقیق کر رہے ہوں۔ بچہ واجب القتل نکلا۔

شاہ محمود قریشی صاحب نے فرمایا ہے کہ کشمیر کے معاملے میں قوم احمقوں کی جنت میں نہ رہے۔ یعنی سلیس اردو میں یہ فرمایا ہے کہ کشمیر پر ہماری طرف سے نا ہی سمجھو، ہم نہیں لڑیں گے۔ اب سوال یہ ہے کہ اگر نواز شریف نے یہی بات بیس برس پہلے کہہ کر واجپائی کو بلایا تھا کہ کشمیر کا حل صرف مذاکرات سے ممکن ہے تو کیا نواز شریف کی سمجھ میں بات موجودہ حکمرانوں سے بیس برس پہلے آ جاتی ہے؟ پراکسی تنظیموں کے معاملے میں نواز شریف کی سمجھ میں بات موجودہ حکمرانوں سے تین برس پہلے آ گئی تھی جب ڈان لیکس کیا گیا تھا۔

یہی معاملہ بے نظیر بھٹو کا تھا۔ جو بات انہیں کئی دہائیاں پہلے سمجھ آ گئی تھی اس پر انہیں سیکیورٹی رسک قرار دیا جاتا تھا۔ اب ان کی بات کو عقل کا پیمانہ مانا جا رہا ہے اور ان کے مخالف موقف رکھتے ہوئے کشمیر کا فوجی یا جہادی حل کرنے کے داعی احمقوں کی جنت کے باسی قرار پائے ہیں۔ کیا ان سیاسی لیڈروں کی سمجھ زیادہ تیز ہے ببلو؟

مکار مودی نے کشمیر کا سپیشل سٹیٹس ختم کر کے اسے ہڑپ کرنے کی کوشش کی تو اس پر بجا طور پر ہمارے وزیراعظم بھنا اٹھے۔ انہوں نے ترنت قومی اسمبلی کا مشترکہ اجلاس بلایا اور اس میں تقریر بھی کی۔ بدقسمتی سے حالات اتنے برے ہیں کہ وہ اپنی بے پناہ مصروفیات کے سبب دوسروں کی تقریریں نہیں سن سکے بس اپنی ہی سنا کر چلے گئے۔ بہرحال انہوں نے قومی یکجہتی کی ضرورت پر بہت زور دیا اور کہا کہ مودی کے کشمیر پر غیر قانونی حملے کے موقعے پر قوم کو یکجا کرنا چاہیے۔

دیکھیں وزیراعظم نے ٹھیک تو کہا ہے کہ مودی کے کشمیر پر حملے کے موقعے پر قوم کو یکجہتی دکھانی چاہیے۔ ہمارے وزیراعظم صرف گفتار کے غازی نہیں ہیں بلکہ کردار کے غازی بھی ہیں۔ اس وقت وہ اپوزیشن کے بڑے لیڈروں کو ایک جگہ یکجا کرنے میں مصروف ہیں۔ بجائے اس بات کے کہ وزیراعظم کی تعریف کی جائے انہیں الٹی سیدھی باتیں سنائی جا رہی ہیں۔ آخر یہ جیل پاکستان میں ہی ہے، دہلی میں تو نہیں ہے۔ پھر شور کیوں؟

روایت ہے کہ ہلاکو خان نے جب بغداد پر فیصلہ کن حملہ کیا تو اہل علم اس اہم ایمانی مسئلے پر باہم دست و گریباں تھے کہ کوا حلال ہے یا نہیں۔ اس سے کلام نہیں کہ روایت سچ ہے یا نہیں لیکن سبق آموز ضرور ہے کہ یقینی تباہی دیکھتے ہوئے بھی غیر اہم سے معاملے پر آپس میں لڑائی بھڑائی جاری تھی۔ ہاں یہ تسلیم کہ ہم دنیا داروں کی نظر میں ہلاکو خان کی بہ نسبت یہ کوا غیر اہم تھا، دوسری دنیا پر گہری نگاہ رکھنے والے علما حضرات کی نگاہ میں یہ کوا ہلاکو خان سے زیادہ اہم ہو سکتا ہے۔ بہرحال ہلاکو آیا۔ سب کو مارا۔ بغداد میں بس کوا ہی زندہ بچا۔

بی جے پی کی حکومت نے بھارتی آئین میں کشمیر کی خصوصی حیثیت ختم کر دی ہے۔ اب غیر کشمیری بھی ریاست میں سیٹل ہو سکیں گے اور اس کی آبادی کا تناسب ویسے ہی تبدیل کیا جا سکے گا جیسا اسرائیل نے فلسطین میں کیا ہے۔ بھارت سے الحاق کے حامی کشمیری سیاست دان بھی اس فیصلے پر شدید ناراض ہو چکے ہیں۔

محبوبہ مفتی نے ردعمل دیتے ہوئے کہا ہے کہ ”آج کا دن بھارتی جمہوریت کے لئے سیاہ ترین دن ہے۔ جموں اور کشمیر کی لیڈر شپ کا 1947 میں دو قومی نظریے کو مسترد کرنے اور انڈیا کے ساتھ جانے کا فیصلہ الٹا گلے پڑ گیا ہے۔

آپ میں سے بہت سے لوگ حیران ہو رہے ہوں گے کہ نواز شریف اور آصف زرداری جیسے گھاگ سیاست دانوں نے یہ کیا حماقت کی ہے۔ محض عددی قوت کے زعم میں آ کر انہوں نے چیئرمین سینیٹ صادق سنجرانی کے خلاف تحریک عدم اعتماد جمع کروا دی۔ کیا انہیں یہ معلوم نہیں تھا کہ طلسم ہوشربا میں لشکر کی تعداد کا اتنا اثر نہیں ہوتا جتنا جادو کا ہوا کرتا ہے۔ کوئی بھی طاقتور ساحر ایک ناریل پھوڑتا ہے یا مونگ کی کالی دال جسم پر ملتا ہے اور اکیلا ہی لاکھوں کے لشکر کو دیوانہ بنا ڈالتا ہے۔

کپتان پچھلے بائیس برس سے قوم کو بتا رہا ہے کہ اس کے تمام مخالف کرپٹ ہیں۔ بدقسمتی سے بیشتر لوگ اس بات کا یقین ہی نہیں کر رہے تھے۔ یہی وجہ ہے کہ کپتان کو گزشتہ انتخابات میں صرف 32 فیصد ووٹ ملے۔ کپتان نے پہلے تو قانونی طریقہ استعمال کرتے ہوئے نواز شریف اور آصف زرداری اور اپوزیشن کے بہت سے لوگوں کو سزا دلوائی مگر بدقسمتی سے لوگوں کی اکثریت کو یہ یقین ہی نہیں آیا کہ اپوزیشن کرپٹ ہے۔ وہ یہی سمجھتے رہے کہ کپتان صرف ذاتی بدلے لے رہا ہے۔ ایسے میں کپتان نے ایسا پتا کھیلا کہ اب اپوزیشن بوکھلا گئی ہے۔

عرفان صدیقی صاحب کو کرایہ نامہ پولیس کے پاس درج نہ کروانے کے جرم پر گرفتار کر کے جیل بھیج دیا ہے۔ پولیس عموماً کام میں ناک تک ڈوبی ہوتی ہے بلکہ بسا اوقات ناک کیا دماغ بھی ڈوب جاتا ہے۔ اسی وجہ سے اسے خیال ہی نہیں رہا کہ جس مکان اور کرائے نامے پر عرفان صدیقی صاحب کے خلاف مقدمہ بنایا جا رہا ہے وہ دونوں تو ان کے نام پر ہی نہیں ہیں۔ مکان اور کرائے نامے دونوں پر ان کے بیٹے عمران خاور صدیقی کا نام درج ہے۔ ہاں یہ بات ضرور تسلیم کرنی پڑے گی کہ کرائے نامے پر ایک جگہ عرفان صدیقی صاحب کا نام درج ہے۔ واضح طور پر لکھا گیا ہے کہ یہ کرایہ نامی عمران خاور صدیقی ولد عرفان الحق صدیقی کے نام پر ہے۔ غالباً پولیس نے یہ سوچا ہو گا کہ مالک مکان نہ سہی مالک مکان کے باپ کو ہی پکڑ لو۔ ویسے تو محاورے اور روایتی طریقہ تفتیش کے مطابق پولیس مالک مکان کی ماں کو پکڑتی ہے مگر اس مرتبہ اس نے رعایت کر دی۔

ہمارے محبوب وزیراعظم عمران خان نے امریکہ میں فرمایا کہ وطن واپس آتے ہی وہ نواز شریف اور آصف زرداری وغیرہ جیسے کرپٹ لوگوں کی جیل کی کھولی سے اے سی نکال لیں گے۔ نواز شریف کے حامی سمجھے ہوں گے کہ یہ بھی ویسا ہی سیاسی بیان ہے جیسا ساہیوال کے سانحے پر عمران خان نے دیا تھا کہ وہ قطر سے واپس آتے ہی انصاف فراہم کر دیں گے۔ یہی غلط فہمی انہیں لے ڈوبی۔ سچ مچ نواز شریف کی کھولی سے اے سی اور ٹی وی نکال لیا گیا۔

عمران خان کے امریکی دورے سے بہت زیادہ توقعات وابستہ نہیں تھیں۔ جب یہ خبریں آنے لگیں کہ اس دورے کی دعوت شہزادہ محمد بن سلمان کے توسط سے لی گئی ہے تو توقعات مزید کم ہو گئیں۔ مگر جس طرح امریکی صدر ڈانلڈ ٹرمپ نے مسئلہ کشمیر کی ثالثی کی پیش کش کی ہے، بلکہ یہ کہہ کر نریندر مودی کو شدید مشکل میں مبتلا کر دیا ہے کہ ثالثی کی یہ خواہش نریندر مودی کی جانب سے ظاہر کی گئی ہے، اس کے بعد صورت حال مختلف دکھائی دے رہی ہے۔ باقی کسر صدر ٹرمپ نے نئے پاکستان کے واری صدقے جا کر پوری کر دی ہے۔

کل رات کپتان کا امریکی سرزمین پر بہت کامیاب شو رہا۔ یہ کسی پاکستانی وزیراعظم کا امریکی سرزمین پر پہلا عوامی جلسہ تھا جو واشنگٹن میں کیپٹل ون ایرینا میں ہوا۔ اس ایرینا میں 20 ہزار افراد کی گنجائش ہے اور شو ایسا ہاؤس فل تھا کہ منتظمین کے مطابق بہت سے لوگ داخل نہ ہو سکے اور باہر سکرینوں پر جلسہ دیکھتے رہے۔ امریکہ جیسے مصروف ملک میں بیس ہزار لوگوں کا جمع ہونا مذاق نہیں ہے۔ اس لئے جلسے کو بہت کامیاب گردانا جائے گا۔

ہمارے محبوب وزیراعظم امریکہ گئے تو امریکی انتظامیہ کے ہاتھ پاؤں پھول گئے۔ تاریخ میں پہلی مرتبہ ایسا ہوا ہے کہ ایک ایسا پاکستانی حکمران امریکہ گیا ہے جسے نہ تو خریدا جا سکتا ہے اور نہ ڈرایا جا سکتا ہے۔ کپتان اپنی ٹرمز پر دوسروں سے بات کرتا ہے۔ بے خوف ایسا کہ سعودی شاہ سے بھی ملے تو سر اٹھا کر اور انگلی تان کر بات کرے اور پروٹوکول ایسے ٹھکرانے والا کہ دنیا کے دو درجن طاقتور ممالک کے سربراہان آ رہے ہوں اور سارا ہال پروٹوکول کے نام پر ان کی خوشامد کرنے کے لئے کھڑا ہو تو کپتان اپنا مقام واضح کرنے کو بے نیازی سے بیٹھا رہے۔

حکومت ڈنڈے کے زور پر ہماری غیر تحریری معیشت کو یکلخت ضابطہ تحریر میں لانے کی کوشش کر رہی ہے اور تاجر ملک گیر ہڑتالیں کر کے اسے ناکام بنانے پر تلے ہوئے ہیں۔ اس سے پہلے جنرل پرویز مشرف بھی یہ کوشش کر چکے ہیں مگر جب ملک کی معیشت اچانک جامد ہو گئی اور سرمایہ دار ملک سے بھاگ کر کینیڈا، دبئی اور بنگلہ دیش وغیرہ میں اپنا کاروبار منتقل کرنے لگا تو پھر جنرل مشرف نے اپنی مہم ترک کی۔ گبر سنگھ کے انداز میں حکومت ایک دو مرتبہ تو ٹیکس وصول کر سکتی ہے، مگر نتیجہ یہ ہو گا کہ سرمایہ دار کسی ایسے ملک کا رخ کرے گا جہاں گبر سنگھ نہ ہو خواہ ٹیکس کی شرح زیادہ ہی کیوں نہ ہو۔ اس کا نتیجہ معیشت کی تباہی کی صورت میں نکلے گا۔

گزشتہ چند دنوں سے آپ سوشل میڈیا پر ایک پوسٹ دیکھ رہے ہوں گے جس میں دعوی کیا گیا ہے کہ وزیراعظم عمران خان اس وجہ سے کسی ہوٹل کی بجائے پاکستانی سفیر کی رہائش گاہ میں رہیں گے کیونکہ انہیں سیتا وائٹ کیس میں گرفتار کیا جا سکتا ہے۔ آئیے دیکھتے ہیں کہ عالمی اور امریکی قانون کے تحت وزیراعظم کی گرفتاری کا کیا امکان ہے۔ پہلے ہم سوشل میڈیا کی متعلقہ پوسٹ پڑھتے ہیں۔

جج ارشد ملک کے حوصلے اور جرات کی جتنی تعریف کی جائے وہ کم ہے۔ ان کا حلف نامہ پڑھ کر علم ہوا کہ بری طرح سے بلیک میل ہونے اور شریف خاندان کی انگلیوں کے اشاروں پر ناچنے کے باوجود رشوت کی پیش کش کو نظرانداز کرتے ہوئے جس طرح انہوں نے میرٹ پر بے خوف و خطر انصاف کیا ہے وہ کسی فانی انسان کے بس کی بات نہیں لگتا۔ پاکستانی عدلیہ کی درخشاں تاریخ میں انہوں نے خود کو امر کر لیا ہے۔

گزشتہ دنوں لکس سٹائل ایوارڈ کی تقریب میں قوم یہ دیکھ کر دم بخود رہ گئی کہ یاسر حسین نے اقرا عزیز کو پروپوز کیا اور کھڑے گھاٹ ہی نچوڑ ڈالا۔ قوم منتظر رہی کہ اس کے بعد لائیو ٹرانسمیشن میں مزید کیا اقدامات اٹھائے جاتے ہیں اور معاملات کس نہج کو پہنچتے ہیں مگر شکر ہے کہ معاملہ زیادہ عیاں نہیں ہوا اور پردہ پڑا رہ گیا۔ اس پر بجا طور پر احتجاج کیا گیا کہ شادی سے پہلے محبت کرنا ہمارا کلچر نہیں ہے۔ اس بات سے تو ہر ذی شعور مرد اتفاق کرے گا کہ شادی سے پہلے لڑکی کا محبت کرنا ہمارا کلچر نہیں ہے۔ ہاں بعض قوی شواہد موجود ہیں کہ شادی کے بعد محبت کرنا ہمارا کلچر ہے۔ مزید تفصیل کے لئے ہمارے کلچر کی عظیم رومانی داستانوں قصہ ہیر رانجھا اور سوہنی مہینوال سے رجوع کریں۔

عزت مآب جج ارشد ملک کے بارے میں مریم نواز کی پریس کانفرنس دیکھ کر دل کچھ پریشان ہوا تھا، شکر ہے کہ جج صاحب نے بتا دیا کہ ویڈیو سیاق و سباق کے بغیر ہے اور اس وجہ سے جعلی ہے۔ لیکن یہ دیکھ کر ایک نئی پریشانی نے آن گھیرا۔ یہ سلسلہ چل نکلا ہے تو کسی ایک ہستی پر تو رکے گا نہیں۔ دبے دبے الفاظ میں کسی بڑے آدمی کا ذکر آ رہا ہے۔ باقی بڑے لوگوں کے ساتھ چاہے جو بھی ہو ہمیں فکر صرف سابق محبوب چیف جسٹس ثاقب نثار کی ہے کہ وہ کسی سازش سے بچ جائیں۔ سنا ہے کہ ادھر ولایت میں ہیں۔ ولایت میں الٹے سیدھے مشروبات اور پکی سگریٹیں وغیرہ عام دستیاب ہیں اور اسرائیلی ایجنٹ بھی ہر گلی کوچے میں پھرتے رہتے ہیں۔ چیف صاحب بہک نہ جائیں کہیں اور انہیں بدنام کرنے کی خاطر سیاق و سباق کے بغیر بنائی گئی کوئی نئی جعلی ویڈیو نہ آ جائے۔

مریم نواز نے کل نون لیگ کی قیادت کے ساتھ مل کر ایک ویڈیو ریلیز کی اور الزام لگایا کہ یہ احتساب عدالت نمبر دو کے جج عالی مقام ارشد ملک صاحب کی ویڈیو ہے۔ اس ویڈیو میں جج صاحب سے یہ باتیں منسوب کی گئی ہیں کہ نواز شریف کے خلاف کوئی پیسہ یا کک بیک لینے کا ثبوت نہیں ملا، نہ کوئی الزام ہے نہ شہادت۔ حسین نواز نان ریزیڈنٹ پاکستانی ہے۔ کوئی ثبوت نہیں کہ ایک پیسہ بھی پاکستان سے لے جایا گیا ہو۔ کسی دو چار منٹ کی ویڈیو کا ذکر ہے اور جینے میں دشواری اور خودکشی وغیرہ کا۔ کچھ وائلن کی ٹیوننگ کر کے اپنی مرضی کی آوازیں نکالنے کی تراکیب بیان کی گئی ہیں۔

قوم پریشان ہوئی پھر رہی تھی کہ شکر ہے اتوار کے دن عالی مقام جج ارشد ملک صاحب نے احتساب عدالت نمبر دو میں جا کر میڈیا کو پریس ریلیز جاری کر دی اور دودھ کا دودھ اور پانی کا پانی کرتے ہوئے مریم نواز کے دعووں کی قلعی کھول دی۔

بات کہنے کو معمولی تھی مگر جب بدمعاشی کا سودا سر میں سمایا ہو تو معمولی باتوں پر ہی بدمعاشی دکھائی جاتی ہے۔ اس لئے یہی بدمعاشی دکھائے ہوئے گزشتہ روز ہمیں دو بچوں اور ڈرائیور سمیت تقریباً ڈیڑھ گھنٹے کے لئے یرغمال بنایا گیا اور رقم کا مطالبہ کیا جاتا رہا۔ ایسا کرنے والے شخص کا دعوی ہے کہ وہ علیم خان کے لئے کام کرتا ہے۔

رانا ثنا اللہ کو کل موٹروے پر سفر کرتے وقت اینٹی نارکوٹکس فورس نے گرفتار کر لیا۔ ظاہر ہے کہ پوری تیاری سے اور بہترین مخبری سے یہ آپریشن کیا گیا، اسی لئے اینٹی نارکوٹکس فورس کو پتہ تھا کہ رانا ثنا اللہ اس وقت کہاں ہیں اور کیا کر رہے ہیں۔ نتیجہ یہ کہ پندرہ کلو ہیروئن ان کی گاڑی سے برآمد کر لی گئی۔ لیکن یہ معاملہ اتنا سادہ نہیں ہے۔

روزنامہ 92 کی خبر سے یہ پتہ چلا ہے کہ یہ ایک بہت بڑا گروہ تھا جس کے لئے رانا ثنا اللہ کام کر رہے تھے۔ اب ظاہر ہے کہ جو منشیات فروش گروپ معمولی اچکوں کی بجائے ایک سابق صوبائی وزیر جو ایک بڑی جماعت کا صوبائی صدر بھی ہے، کو منشیات کی نقل و حمل کے لئے کیرئیر کے طور پر استعمال کرتا ہو وہ واقعی بہت بڑا اور با اثر ہو گا۔ خبر سے ہمارے اس گمان کی تصدیق بھی ہو گئی۔ یہ کوئی چھوٹا موٹا معاملہ نہیں ہے بلکہ ایک عالمی مافیا کا معاملہ ہے۔

آج پاکستان کی تاریخ کا سب سے بہترین بجٹ پیش کر دیا گیا ہے جو غریبوں کی مشکلات میں اضافہ نہیں کرے گا بلکہ امیر افراد سے پیسہ نکلوائے گا۔ اس کے علاوہ اس بجٹ کا ایک بڑا مقصد لوگوں کی صحت کو بہتر کرنا ہے۔ لیکن مزید تفصیل میں جانے سے پہلے ہم یہ طے کر لیں کہ امیر کون ہے اور غریب کون۔ خوش قسمتی سے بجٹ میں یہ بتا دیا گیا ہے اور ہمیں اپنا قیمتی دماغ خرچ کرنے کی ضرورت نہیں ہے۔

بجٹ میں بتایا گیا ہے کہ ”چکن، مٹن، بیف اور مچھلی کے گوشت کی سیمی پراسیسڈ اور پکی ہوئی اشیا کی کھپت میں کافی اضافہ دیکھا گیا ہے۔ یہ اشیا عمومی طور پر خوشحال افراد کے استعمال میں آتی ہیں۔ تجویز ہے کہ ان اشیا پر 17 فیصد سیلز ٹیکس لاگو کیا جائے“۔ یعنی اب یہ تعین کرنا آسان ہو گیا ہے کہ جو شخص بھی پکی ہوئی مرغی، بکرا، گائے بھینس یا مچھلی کھاتا ہے وہ امیر ہے اور جو انہیں کچا ہی کھا جاتا ہے وہ غریب ہے۔ اسی وجہ سے گیس پر درآمدی ٹیکس کو بڑھایا گیا ہے۔ امیر آدمی ہی کھانے کو پکا کر کھاتا ہے۔ غریب تو کچا ہی کھاتے ہیں۔ یوں گیس مہنگی ہونے سے غریب متاثر نہیں ہو گا۔

وزیراعظم نے آج صبح قوم سے خطاب کی ریکارڈنگ نشر کی ہے۔ وزیراعظم نے قوم کے نام اپنے پیغام میں کہا کہ پاکستانیوں کے بینک اکاؤنٹس کی معلومات آرہی ہیں جو پہلے کبھی کسی حکومت کے پاس نہیں تھی۔ وزیراعظم نے کہا کہ عوام سے کہتا ہوں کہ جن کا پیسہ باہر پڑا ہوا ہے وہ 30 جون تک اثاثے ظاہر کرنے کی اسکیم میں شریک ہوں اور اس سے فائدہ اٹھائیں اس کے بعد انہیں موقع نہیں ملے گا۔

ہماری قوم ٹیکس دینے والی قوم نہیں ہے۔ اب 5 لاکھ سے زیادہ بیلنس والے اکاؤنٹ کو ٹیکس وصول کرنے کے لیے مارک کیا جائے گا تو کیا ہو گا؟ صرف ملازمت پیشہ غریب غربا مہینے کے شروع میں کچھ رقم جمع کروائیں گے جو مہینے کے آخر تک ختم ہو جایا کرے گی۔ کاروباری حضرات تو پہلے ہی پرچی اور کیش پر اپنا کاروبار منتقل کر رہے تھے۔ اب بچت بھی لاکر میں اور سونے کی شکل میں رکھی جائے گی۔ باقی معیشت تو 6.2 فیصد کے ہدف سے ترقی کرنے کی بجائے 3.3 فیصد رہی تھی، مگر بینکنگ سیکٹر کچھ سانس لے رہا تھا۔ اب اس کی بھی انا للہ پڑھ لیں۔ عوام اور سرمایہ داروں کو بینکوں سے دور بھگانے کا یہ بہترین نسخہ ہے۔

ہمارے وزیراعظم اقتدار میں آنے کے بعد سے مسلسل کوشش کر رہے ہیں کہ کسی طرح نریند مودی ان کے ساتھ مذاکرات کر لے۔ کبھی خط لکھتے ہیں۔ کبھی فون کرتے ہیں۔ کبھی ٹویٹ کرتے ہیں۔ پھر وہ لفٹ نہیں کراتا تو کڑھتے ہیں کہ چھوٹے عہدوں پر فائز ہو گئے ہیں۔ اور اس کے بعد دوبارہ خط لکھ کر امن مذاکرات کی دعوت دے دیتے ہیں۔

مودی کو بار بار خط لکھ کر منتیں کرنا شرمناک ہے اور ایک ایسے ملک کے باحمیت حکمران کو زیب نہیں دیتا جو عالم اسلام کی سب سے بڑی ایٹمی طاقت ہو۔ مودی ایسے اکڑ کر دکھا رہا ہے جیسے ہمیشہ جنگ وہ جیتتا رہا ہو اور ہم ہارتے رہے ہوں۔ حالانکہ تاریخ گواہ ہے کہ پاکستانی فاتحین نے نریندر مودی کے بھارت کو ہمیشہ شکست دی ہے۔

زرتاج گل۔ نعیم الحق۔ اور اب ایک اور بھی۔ اور پنجاب سے مزید ایک۔ پہلے تو ہمیں لگ رہا تھا کہ خدانخواستہ تحریک انصاف اقربا پروری کر رہی ہے۔ لیکن شکر ہے کہ محترمہ زرتاج گل نے وضاحت کر دی۔ نیکٹا کا موقف بھی سامنے آیا جس سے ہمیں علم ہوا کہ محترمہ زرتاج گل کی سفارش کو نیکٹا نے جوتے کی نوک پر رکھتے ہوئے مسترد کر دیا اور میرٹ پر شبنم گل کا تقرر کیا۔

فرض کریں کہ آپ کے علاقے میں جرائم بہت بڑھ گئے ہیں۔ بہت لوٹ مار ہونے لگی ہے۔ ایک طرف بدمعاش بھتہ لینے تو دوسری طرف ہر دو مہینے بعد آپ کا موبائل چھین لیا جاتا ہے۔ آپ مقامی تھانیدار کی نا اہلی پر شدید ناراض ہو جاتے ہیں۔ سیدھا تھانے کا رخ کرتے ہیں اور مولا جٹ کے انداز میں بڑھک لگاتے ہیں ”اوئے تھانیدار، یہ تھانہ میں چلاؤں گا“۔ اگر آپ کی قسمت اچھی ہے تو یہ بڑھک سن کر تھانیدار ہنسنے لگے گا۔ ورنہ آپ رونے لگیں گے۔ یہ حرکت کارِ سرکار میں بے جا مداخلت کہلاتی ہے۔

قوم کئی برس پریشان رہی، پھر اب گزشتہ کئی برس سے لطیفے بنا بنا کر ہنس رہی ہے، لیکن وطن عزیز میں عید رمضان کی خبر لانے والا پہلی تاریخ کا چاند مسلسل تین چار دن دکھائی دیتا رہا ہے۔ پشاور اور نواح میں وہ باقی ملک سے ایک دن پہلے مفتی شہاب الدین پوپلزئی کی غیر سرکاری رویت ہلال کمیٹی کو دکھائی دے جاتا ہے۔ ایک مرتبہ ادھر قبائلی علاقوں میں ان سے بھی ایک دن پہلے گواہوں نے دیکھ لیا تھا۔ عموماً یہ چاند افغانستان اور سعودی عرب میں بھی انہی تاریخوں میں دکھائی دیا کرتا ہے۔ جبکہ مفتی منیب کی سرکاری رویت ہلال کمیٹی والا چاند بھارت اور بنگلہ دیش کے ساتھ دکھائی دیا کرتا ہے۔ قوم پریشان تھی کہ مفتی منیب اور مفتی شہاب کب چاند پر متفق ہوں گے۔ شکر الحمدللہ اس عید پر وہ چاند کے معاملے میں متفق ہو گئے ہیں۔

ہمارے لئے یہ بات ماننی مشکل ہے کہ سیاست دان ہی ملک و قوم کو جوڑ کر رکھ سکتے ہیں۔ ہمارے ذہن میں شروع سے یہ بیٹھا ہوا ہے کہ جب بھی کسی جگہ شورش برپا ہو تو ایک عظیم فاتح دگڑ دگڑ گھوڑے دوڑاتا ہوا آتا ہے اور باغیوں کی ایسی سرکوبی کرتا ہے کہ ان کے سروں کے مینار بنانے پڑ جاتے ہیں۔ روایت کے مطابق نادر شاہ درانی سے اس کے پسر عزیز کے نکاح کے وقت شجرہ طلب کیا گیا۔ یعنی کمال دیکھیں کہ شہنشاہ ہند نے بیٹی پہلے دی اور دولہا میاں کا حسب نسب بعد میں بوقت نکاح دیکھا۔ مقصد اسے خفیف کرنا تھا کہ دیکھو ہم صاحبقراں امیر تیمور گورگاں کی نسل سے ہیں، تم کیا ہو، گڈریے؟ اس پر نادر شاہ نے قلم کا جواب تلوار سے دیتے ہوئے اپنا شجرہ نادر شاہ درانی ابن شمشیر ابن شمشیر بیان کیا تو شہنشاہ ہند اور درباریوں کی تسلی ہو گئی۔

اب ہم یہ یقین کرنے لگے ہیں کہ جب بھی شادی بیاہ، سماجی بے چینی، یا کھانے میں نمک زیادہ پڑ جانے کا مسئلہ درپیش ہو تو اس کا حل تلوار یا اس کا لائسنس نہ ہونے کی صورت میں ڈنڈے سے نکالا جاتا ہے۔ جبکہ سیانے لوگوں کے نزدیک جنگ آخری مرحلہ ہوتی ہے جس سے ہر صورت بچنا چاہیے۔ اسی سے وہ مشہور یورپی ضرب المثل نکلی ہے کہ جنگ اتنا سنجیدہ معاملہ ہے کہ اسے جرنیلوں پر نہیں چھوڑا جا سکتا۔

عام آدمی کے لئے ریاست کا نمائندہ کون ہوتا ہے؟ اس کا انتظامی افسر۔ جب عام آدمی کو ریاست سے وہ تحفظ چاہیے ہوتا ہے جس کے وعدے پر ریاست قائم ہوئی ہے تو سب سے پہلے اسے پولیس دکھائی دیتی ہے۔ کوئی اس سے جان و مال چھیننے کی کوشش کرے تو وہ ریاست سے یہ توقع کرتا ہے کہ اسے پولیس کے ذریعے ریاست تحفظ دے گی۔ لیکن اگر پولیس ہی اس کی جان کی دشمن بن جائے تو پھر کیا ہو گا؟ اس سے بھی بڑھ کر اگر پولیس ایک جوان جوڑے کو جاتا دیکھے اور اسلحے کے زور پر لڑکی کو اغوا کر کے ریاست کی سرکاری گاڑی میں اس کا کئی گھنٹے تک گینگ ریپ کرے تو یہ عزت لڑکی کی لٹی ہے یا ریاست کی اپنی؟ کیا لڑکیاں اب ریاست سے بھی اپنی عزت بچائیں گی؟

کیا ریاست کی نظر میں ہر پاکستانی لڑکی اب ایک ایسی طوائف قرار پائی ہے جس سے زبردستی سیکس کرنے کے بعد اسے پیسے دے کر چپ کروا دیا جائے؟ مہذب ملکوں میں تو طوائف سے بھی زبردستی سیکس کرنے پر ریپ کا مقدمہ قائم ہوتا ہے، اور ادھر یہ حال ہے کہ ایک شریف لڑکی کی عزت لوٹ کر سرکاری اہلکار اسے پیسے دے رہے ہیں۔ بہرحال یہ بھی ان کی مہربانی ہے، ورنہ ایف آئی آر کے مطابق تو انہوں نے لڑکی کا ریپ کرنے کے بعد اس سے رقم اور زیورات بھی لوٹ لئے تھے۔

ان دنوں سوشل میڈیا پر یہ بحث چل رہی ہے کہ اگر کوئی مرد افسر اپنے دفتر میں کسی خاتون سے قربت اختیار کرے اور اس کی ویڈیو سامنے آ جائے تو کیا ویڈیو کو سامنے لانے کو غلط کہا جائے گا؟ کیا لبرل ازم کے اصولوں کے مطابق اس افسر کو اس بات کا حق حاصل نہیں ہے کہ اپنی نجی زندگی جیسے جی چاہے بسر کرے؟ دلیل یہ دی جاتی ہے کہ لبرل ازم افراد کی نجی رومانی زندگی کا تحفظ کرتا ہے اور اسے پبلک میں ڈسکس کرنا یا اس پر اعتراض کرنا لبرل نظریات کے مطابق غلط ہے۔

یہ معاملہ اس وقت تک نجی زندگی سے تعلق رکھتا ہے جب تک دونوں افراد راضی خوشی بغیر کسی دباؤ، دھمکی یا خوف کے ایسا کر رہے ہوں۔ ہم پاکستان کے تناظر میں ہی بات کرتے ہیں جہاں خواتین کو دفاتر میں جنسی ہراسانی سے بچانے کے لئے 2010 میں ایک قانون منظور ہوا تھا۔ یہ قانون اس لحاظ سے دلچسپ ہے کہ صرف خاتون ملازمین کو تحفظ دیتا ہے، سرکاری دفتر میں کسی کام سے جانے والی عام خواتین کو نہیں۔ بہرحال اس سے ہم جنسی ہراسانی کی تعریف اخذ کرتے ہیں۔

عام خیال یہ ہے کہ شہید صرف وہ ہوتا ہے جو اللہ کی راہ میں جنگ کرتا ہوا مارا جائے۔ صحابہ کرام کی بھی یہی رائے تھی کہ ”جو اللہ کے راستہ میں قتل کیا جائے وہ شہید ہے“۔ یہ سن کر آپ صلی اللہ علیہ وسلم نے فرمایا کہ ”ایسی صورت میں تو میری امت کے شہید کم ہوں گے“ اور اس کے بعد بتایا کہ شہید کون کون ہوتا ہے۔ مندرجہ ذیل احادیث مبارکہ صحاح ستہ سے لی گئی ہیں اور ان میں بتایا گیا گیا ہے کہ کون کون شہدا میں شامل ہوتا ہے۔

صحافی سہیل اقبال بھٹی نے خبر دی کہ کیکڑے میں تیل اور گیس کچھ نہیں ملا۔ وہ لکھتے ہیں کہ ”سات بجے جونہی بریک کی تو دوسری جانب وزیراعظم عمران خان نے براہ راست خطاب کے دوران میری خبر کی تردید کرتے ہوئے کہا کہ قوم نوافل ادا کرے، ایک ہفتے تک رپورٹ تیار ہو جائے گی، تیل وگیس کا اتنا بڑا ذخیرہ مل سکتا ہے جو 50 سالوں کے لئے کافی ہوگا۔ “ دو تین گھنٹے بعد ہی وزیراعظم کے معاون خصوصی ندیم بابر نے خبر کی تصدیق کر دی۔

کیا واقعی پاکستان کی تاریخ کے باخبر ترین وزیراعظم اس بات سے بے خبر تھے جو ایک عام سے اخباری رپورٹر کے علم میں تھی؟ ایسا نہیں ہے۔ وزیراعظم کے پاس پکی خبر تھی کہ کیکڑا کی لوکیشن پر بے تحاشا تیل اور گیس موجود ہے اور یہ دنیا کی سب سے بڑی آئل فیلڈ ہے۔ پھر ہوا کیا؟ یہ تیل اور گیس کہاں گئے؟

سیاست میں ایسے لوگ کم ہیں جن کی عزت پارٹی لائن سے بالاتر ہو کر کی جاتی ہے۔ ان میں قمر زمان کائرہ، پرویز رشید، رضا ربانی اور افراسیاب خٹک سرفہرست ہیں۔ بات کرتے وقت ان کی زبان برے الفاظ سے آلودہ نہیں ہوتی۔ وہ بدترین مخالفین کا ذکر مہذب انداز میں کرتے ہیں۔ انہوں نے اپنی اپنی پارٹی کا برے بھلے ہر طرح کے حالات میں ساتھ دیا۔ وہ کبھی اقتدار کے لالچ میں لوٹے نہیں بنے۔ ان کی باتوں سے علم چھلکتا ہے۔ ان کی گفتگو سن کر پتہ چلتا ہے کہ مدبر کیسے بات کرتے ہیں۔ مہذب انداز میں اختلاف کیسے کیا جاتا ہے۔ نظریات پر کس استقامت سے قائم رہا جاتا ہے۔ جمہوریت سے ہٹنے کے لئے اقتدار کا لالچ دیا جاتا ہے تو اس لالچ کو کیسے ٹھکرایا جاتا ہے۔

کل ان کے بیٹے کے حادثے کی خبر ملی تو یہ ہمارے لئے ایک ذاتی صدمے کی سی کیفیت تھی۔ چھوٹے بچوں کے جنازوں کے بارے میں کہا جاتا ہے کہ ان سے بھاری کچھ دوسرا نہیں ہوتا۔ لیکن ہوتا ہے۔ جوان اولاد کے جنازے سے بڑھ کر بھلا اور کیا بھاری ہو سکتا ہے۔ یہ ماں باپ کی کمر توڑ دیتا ہے۔

چودہ مئی کے ملتان کے روزنامہ خبریں میں ایک استانی پر ایک نجی سکول کے بے شمار احسانات کی خبر آئی جس پر ہمیں بہت زیادہ یقین نہیں آیا تو ملتان کے ایک سینئیر صحافی سے بھی تصدیق کرنی پڑی۔ پتہ چلا کہ خبر میں کوئی سقم نہیں ہے۔ سوشل میڈیا پر کچھ مزید تفصیلات بھی ہیں۔

قصہ یہ پتہ چلا کہ ملتان میں ایک لاریٹس نامی سکول ہے جو ایک بہت غریب پرور سیاست دان خالد جاوید وڑائچ کی ملکیت ہے۔ وہ حکومتی پارٹی میں ہونے کی وجہ سے غربت ختم کرنے اور لوگوں کو زیادہ سے زیادہ جابز دینے کی کوشش کرتے ہیں۔ ظاہر ہے کہ ان کا بجٹ تو محدود ہے اس وجہ سے سٹاف کو حکومت کی مقرر کردہ کم از کم تنخواہ یعنی 16 ہزار روپے ماہانہ تنخواہ نہیں دے پاتے۔ بلکہ خبریں کی رپورٹ کے مطابق میٹرک پاس استانی کو تین ہزار، ایف اے پاس کو پانچ ہزار، بی اے پاس کو آٹھ اور ایم اے پاس کو بارہ ہزار دیتے ہیں۔

شاہ محمود قریشی اور دوسرے پنجابی پیروں اور جاگیرداروں کے اجداد پر نفرت بھرے انداز میں الزام لگایا جاتا ہے کہ انہوں نے 1857 میں انگریز کا ساتھ دیا تھا۔ الزام تو درست ہے مگر اس کا تناظر کیا ہے؟

یہ بات بتاتے وقت ہم ایک حقیقت بھول جاتے ہیں۔ پنجاب پر سکھوں کی حکومت تھی۔ کئی علاقوں مثلاً شاہ محمود قریشی کے ملتان وغیرہ پر انہوں نے کافی ظالمانہ انداز میں فتح حاصل کی تھی۔ کئی مسلمان حکومتوں کو پنجاب سے لے کر کشمیر اور ملتان تک سکھوں نے شکست دے کر ان کا خاتمہ کیا تھا۔ بہت سے مسلمان سکھا شاہی سے نالاں تھے۔ مہاراجہ رنجیت سنگھ کے دربار میں مسلمان عمائدین بھی موجود تھے اور رائے احمد خان کھرل جیسے سردار بھی مہاراجہ کے ساتھی تھے جو بعد میں انگریزوں کے خلاف جنگ میں اساطیری حیثیت حاصل کر گئے، مگر یہ بھی حققیت ہے کہ سکھوں کے دور میں مسلمانوں کے حالات اتنے اچھے نہیں تھے۔ روایت کے مطابق بادشاہی مسجد لاہور کو رنجیت سنگھ کی سپاہ اصطبل کے طور پر استعمال کیا کرتی تھی۔ یہی حال کچھ دوسری مساجد کا بھی بتایا جاتا ہے۔

دو برس پہلے رمضان میں ناران جانا ہوا۔ ساتھ ڈیڑھ برس سے شروع ہونے والے بچے بھی تھے۔ ہوٹل والے ناشتہ دینے سے انکاری تھے۔ بمشکل ایک ہوٹل میں جگہ ملی جو ناشتہ دینے پر تیار تھا۔ ہوٹل کے مالک نے بتایا کہ ادھر مفتی صاحب فرماتے ہیں کہ رمضان میں سیر سپاٹے پر نکلنے والوں پر عیاشی کے احکامات لاگو ہوتے ہیں، مسافرت کے نہیں۔ اگر یہ بات پتہ چلے کہ ہوٹل رمضان کے اوقات میں خواہ ننھے بچوں کو ہی کھانا دے رہا ہے تو مفتی صاحب کے عقیدت مند اس کا جلاؤ گھیراؤ کر دیں گے۔ وقار ملک کے بلاگ پر ان کے ننھے بچوں کو پیش آنے والی مشکل صورت حال پر ایک سواتی صاحب کا بھی یہ موقف پڑھا کہ ”رمضان میں سیر سپاٹے کو سفر نہیں کہتے۔ کوئی انتہائی کام یا روزگار کے لئے سفر ہو تو سفر کہتے ہیں۔ سیر سپاٹے کے لئے رمضان میں نکلنا نہیں چاہیے۔ “

ہمارا دینی علم مفتی صاحبان جتنا نہیں ہے۔ مگر تھوڑا بہت دین کا علم بہرحال رکھتے ہیں۔ اسی کی روشنی میں اپنی وال پر مفتی صاحبان سے خصوصاً اور عام افراد سے عموماً یہ سوال پوچھ لیا:

”کیا اس دعوے کے حق میں قرآن یا حدیث سے دلیل دی جا سکتی ہے جس سے واضح ہو کہ سفر کیا ہوتا ہے کیا نہیں؟ کیا نماز قصر کے معاملے میں سفر کی شرائط بھی یہی سیر سپاٹے والی ہوتی ہیں، یعنی اگر کوئی شخص سیر و تفریح کی نیت سے سفر کر رہا ہے تو وہ پوری نماز پڑھے گا اور اگر کوئی ’انتہائی اہم کام‘ یا روزگار کے سلسلے میں سفر کر رہا ہے تو اسے قصر پڑھنے کی اجازت ہے؟ یا پھر نماز قصر کے احکامات میں جسے سفر کہا گیا ہے روزے کے احکامات میں بھی وہی سفر کہلائے گا؟ “

ایک چار سالہ بچی فیڈر ہاتھ میں تھامے کھڑی ہے۔ اس نے نئے کپڑے پہنے ہوئے ہیں۔ بال سلیقے سے بنے ہوئے ہیں اور ان میں کلپ لگا ہوا ہے۔ اس کی ماں نے بہت توجہ اور پیار سے اپنی ننھی پری کو تیار کیا ہے۔ اسے وہ شادی میں لے کر جا رہی تھی۔

ایک دوسری تصویر ہے۔ اسی لڑکی نے اپنے دونوں ہاتھ جوڑے ہوئے ہیں۔ اس کے بال بکھرے ہوئے ہیں۔ کسی نے انہیں نہیں سنوارا ہے۔ بال پیشانی پر بے ڈھنگے پن سے کٹے ہوئے ہیں۔ اس نے کھلی آستین والی قمیض پہنی ہوئی ہے۔ یہ لگتا ہے کہ اس نے اپنے جوڑے ہوئے ہاتھ نیچے لٹکائے تو آستینیں اس کے ہاتھوں سے بڑی ہوں گی۔ شاید اس نے کسی بڑی بچی کی قمیض پہن رکھی ہے۔ صاف دکھائی دے رہا ہے کہ اس پری کو سجانے سنوارنے والا اب کوئی نہیں ہے۔ اس کی ماں، بڑی بہن اور باپ کو پولیس کئی ماہ پہلے قتل کر چکی ہے۔ اب اس کی وہی حالت ہے جو ایک یتیم و یسیر بچی کی ہوتی ہے۔

ہمارے محبوب وزیراعظم جناب عمران خان نے سوہاوہ کے مقام پر پاکستان کی تاریخ کا اہم ترین قدم اٹھاتے ہوئے سائنس کو سپر سائنس بذریعہ روحانیت بنانے کا سنگ بنیاد رکھ دیا ہے۔ اس پر بعض کم فہم مخالفین ان کا مذاق اڑا رہے ہیں۔ دیکھیں ہمیں یہ بات سمجھنی چاہیے کہ عمران خان الفاظ کے نہیں عمل کے آدمی ہیں۔ عملیات میں الفاظ کم پڑ جاتے ہیں کیفیات کے بیان کے لئے۔

میں الفاظ کا آدمی ہونے کی وجہ سے سمجھ سکتا ہوں کہ ہمارے وزیراعظم کیا کہہ رہے ہیں۔ وہ کہہ رہے ہیں کہ وہ روحانیت کو ویسے ہی پیرا سائنس بنا کر سائنس سے بالاتر کر دیں گے جیسے پیرا سائیکالوجی کو سائیکالوجی سے اور پیرا نارمل کو نارمل سے برتر سمجھا جاتا ہے۔ ان سے غلطی یہ ہوئی کہ بالا کا ترجمہ پیرا کی بجائے سپر کر بیٹھے۔ ورنہ وہ ٹھیک سوچ رہے ہیں۔

کل ایک پریشان کن خبر پڑھ کر ہم دیار غیر میں بھی ٹینشن میں بیٹھے ہیں۔ پہلے آپ بھی خبر پڑھ لیں تاکہ دیار یار میں آپ ہم سے بھی زیادہ پریشان ہو سکیں۔

صدر پاکستان عارف علوی نے بتایا ہے کہ عمران خان ملک کی حالیہ صورتحال پر کافی پریشان ہیں۔ ان کی پریشانی اس قدر زیادہ بڑھ گئی ہے کہ انہوں نے صبح کی واک کرنا تک چھوڑ دی ہے۔ ”میں نے بارہا کہا ہے کہ ورزش آپ کی دماغی صحت کے لئے بے حد ضروری ہے، آپ خود کو ایکٹو رکھیں۔ جس کا جواب دیتے ہوئے وزیراعظم عمران خان نے مجھے کہا کہ ڈاکٹر صاحب ہم چیزوں کو جیسے دیکھتے تھے، یہ ویسی نہیں ہیں۔ ہمارا تین ماہ کا پلان فیل ہو گیا۔ اب صورتحال یہ ہے کہ ملکی حالات بھی آج تک ٹھیک نہیں ہو پا رہے اور نہ چیزوں پر کہیں کوئی عملدرآمد ہوتا دکھائی دے رہا ہے۔ “

کیا یہ محض اتفاق ہے کہ جس دن عمران خان نے ایران کا دورہ شروع کرنا تھا عین اسی دن امریکی صدر ڈانلڈ ٹرمپ نے ایران پر پابندیاں سخت کرنے کا اعلان کر دیا اور کہا کہ جو ممالک اس سے تیل خریدنے کے لئے امریکی استثنا رکھتے تھے، اب وہ بھی پابندیوں کا شکار ہوں گے۔ اس اعلان کی ٹائمنگ اہم ہے۔ صاف ظاہر ہے کہ امریکیوں کو خطرہ تھا کہ پاکستان میں پہلی مرتبہ آنے والی مخلص، بے باک، معاملہ فہم، نان کرپٹ اور دانش مند قیادت ایران سے تیل کا کوئی ایسا معاہدہ کر لے گی جس سے پاکستان کی پانچوں انگلیاں گھی میں اور سر کڑاہی میں ہو گا۔

اب آپ دورے کے مشترکہ اعلامیے کو دیکھیں۔ اتنے بڑے دورے کے بارے میں کوئی خاص اعلان نہیں کیا گیا۔ بس یہ کہا گیا کہ بارڈر پر مشترکہ گشت ہو گا اور مارکیٹیں بنا دیں گے۔ باڑ لگ جائے گی۔ نئی سرحدی کراسنگ بن جائے گی۔ کیا اتنے اعلی سطحی دورے پر ایسے معاہدے ہوتے ہیں؟

عمران خان کی وائرل ہونے والی 32 سیکنڈ کی ویڈیو میں وہ کہہ رہے ہیں کہ ”جرمنی اور جاپان نے اپنے کئی ملین سویلین مارے، حتی کہ دوسری عالمی جنگ کے بعد انہوں نے یہ فیصلہ کیا کہ وہ اپنے بارڈر پر، جرمنی اور جاپان کے بارڈر پر مشترکہ انڈسٹری لگائیں گے۔ اس لئے اب یہ سوال ہی پیدا نہیں ہوتا کہ دونوں کے تعلقات خراب ہوں کیونکہ ان کے معاشی مفادات آپس میں جڑ چکے ہیں۔ “

اس پر یہ شور مچ گیا ہے کہ عمران خان کو جغرافیے کا ہی نہیں پتہ اور وہ وسطی یورپ میں واقع جرمنی کو نو ہزار کلومیٹر دور بحر الکاہل میں واقع جاپان کا ہمسایہ کہہ رہے ہیں۔ حالانکہ یہ بات سائنسی طور پر ثابت شدہ ہے کہ کچھ ہی عرصہ قبل جرمنی اور جاپان ایک ہی براعظم پر تھے۔

مجھے اکثر افسوس ہوتا رہتا ہے کہ بیشتر لوگ مجھ جتنے محب وطن اور ذی شعور کیوں نہیں ہیں۔ کیا انہیں رتی بھر احساس نہیں ہے کہ ملک و قوم کس نازک مرحلے سے گزر رہے ہیں؟ کیا انہیں ذرہ برابر پروا نہیں ہے کہ ملکی مفاد کا تقاضا کیا ہے؟ کیا اس طرح معیشت، سیاست اور خارجہ پالیسی کے متعلق اپنی رائے ظاہر کر کے وہ وطن عزیز کی جڑِیں نہیں کاٹ رہے ہیں؟ آخر وہ سب میری طرح کیوں نہیں سوچتے؟

یاد رہے کہ میں جو کچھ بھی لکھتا ہوں وہ قومی خدمت کے جذبے سے کسی صلے ستائش یا معاوضے کی تمنا کے بغیر لکھتا ہوں کیونکہ میرے دل میں قوم کا بے پناہ درد ہے اور مجھ سے زیادہ کوئی قوم سے مخلص نہیں ہے۔ وہ میری رائے کے خلاف ایک چار چھے لفظی کمنٹ بھی کرتے ہیں تو وہ ایسا ڈالر یا ریال یا تومان لے کر کرتے ہیں اور وہ ملک دشمنوں کے ایجنڈے پر چل رہے ہیں۔

بوئنگ 737 میکس میں نقص یہ تھا کہ اس کی دم پر وزن زیادہ ڈال دیا گیا تھا اور باڈی کے پرانے انجن کی جگہ زیادہ پاور فل انجن لگا دیے گئے تھے۔ نتیجہ وہی نکلا جو آپ نے موٹر سائیکل پر اس وقت محسوس کیا ہو گا جب آپ اچانک زیادہ ریس دے دیتے تھے اور پتہ چلتا تھا کہ اگلا ٹائر ہوا میں بلند ہو گیا ہے اور بعض مرتبہ آپ پیچھے زمین پر پڑے ہوتے تھے۔ یا پھر کسان اس صورت حال کو یاد کر سکتے ہیں جب ٹرالی پر خوب لوڈ ہو اور ٹریکٹر کو چلا دیا جائے تو اس کے دونوں اگلے پہیے ہوا میں بلند ہو جاتے ہیں۔ یا پھر گدھا گاڑی کو یاد کر لیں جب اسے آف لوڈ کرنے کے لئے پیچھے وزن زیادہ کر دیا جاتا ہے تو گاڑی کا انجن یعنی گدھا ہوا میں بلند ہو جاتا ہے۔

بوئنگ 737 میکس کے ساتھ یہی ہوا۔ اب موٹر سائیکل تو ایک قلابازی کھا کر فوراً زمین پر آ جاتی ہے۔ ٹریکٹر بھی دو چار گز چل کر چاروں پہیوں پر چلنے لگتا ہے۔ گدھا بھی بخیر و عافیت زمین پر واپس اتر آتا ہے۔ لیکن جہاز نازک مشین ہے۔ زمین پر غیر فطری طریقے سے اترے تو بے وفا محبوبہ کے عاشق کے دل کی طرح ٹکڑے ٹکڑے ہو جاتا ہے۔

اسد عمر وزیر خزانہ نہ رہے۔ اب سب یہ بیٹھ کر سوچیں کہ اسد عمر سے عین بجٹ بناتے ہوئے وزارت خزانہ کیوں چھینی گئی ہے؟ آئی ایم ایف سے مذاکرات بھی آخری مرحلے میں تھے۔ انہیں بھی دھچکا لگے گا۔ میرا خیال ہے کہ اسد عمر ہسپتالوں اور سکولوں کے لئے بجٹ میں مطلوبہ حصہ نہیں رکھ رہے ہوں گے۔ اس لئے کپتان نے نکال دیا۔

اسد عمر کے بارے میں سب جانتے ہیں کہ وہ ایک راست باز، مستقل مزاج اور قوم کا درد رکھنے والے انسان ہیں۔ جب وہ ماہانہ لاکھوں کروڑوں روپے کما رہے تھے تو کپتان کے یہ کہنے پر کہ ’اسد قوم کو تمہاری ضرورت ہے‘ اس نوکری پر لات مار کر کپتان کے ساتھ شامل ہو گئے۔

اسد عمر نے استعفی دے دیا۔ کپتان کا سب سے بلند قامت کھلاڑی آؤٹ ہو گیا۔ اسد عمر کا الوداعی پریس کانفرنس میں کہنا ہے کہ کل رات تک خود انہیں اس فیصلے کی خبر نہیں تھی، ”نئے وزیر خزانہ کو بھی مشکلات کا سامنا ہوگا اور وہ ایک مشکل معیشت سنبھالے گا، لوگ نئے وزیر خزانہ سے تین ماہ میں معجزوں اور دودھ شہد کی نہریں بہنے کی توقع نہ کریں۔ “ دلچسپ چیز یہ ہے کہ اس پریس کانفرنس کے دوران اسد عمر تحریک انصاف کی حکومت بننے کے بعد پہلی مرتبہ نہایت خوش دکھائی دیے۔ انہوں نے بہت چہکتے ہوئے ایسے یہ پریس کانفرنس کی جیسے ایک جنجال سے ان کا پیچھا چھوٹا ہو۔

بہرحال تحریک انصاف کے سیاسی مخالفین کو اسد عمر کی رخصتی پر بہت زیادہ خوش ہونے کی ضرورت نہیں ہے۔

بلیک ہول کے متعلق بتایا جاتا ہے کہ یہ ایک نہایت ہی مہیب شے ہوتی ہے جو اپنے ارد گرد گزرنے والی ہر شے کو کھا جاتی ہے۔ خواہ کوئی بڑا سا ستارہ ہو یا روشنی کا ننھا سا ذرہ، بلیک ہول اسے چٹ کر جاتا ہے۔ تصویر خواہ کیمرے کے پردے پر اترے یا آنکھ کے، اس کا اصول ہوتا ہے کہ جس شے سے روشنی منعکس یا خارج ہو، وہی دکھائی دیتی ہے۔ بلیک ہول روشنی کھا جاتا ہے اس لئے اس کا دکھائی دینا ناممکن ہے۔

اب ایک فسادی عورت کیٹی بومین نامی آئی ہے۔ اس نے دعوی کیا ہے کہ اس نے سینکڑوں افراد پر مشتمل ٹیم اور دنیا کے چاروں کونوں میں موجود دوربینوں کے ذریعے ہماری زمین سے کوئی 05 کروڑ کھرب (دیسی گنتی میں 50 مہا سنکھ) کلومیٹر کے فاصلے پر میسیر 87 نامی کہکشاں میں موجود ایک بلیک ہول کی تصویر اتار لی ہے۔

اگر عام حالات ہوتے تو ہم اس بلیک ہول کی تصویر کو ایک عام سی بات سمجھ کر نظرانداز کر دیتے۔ ہم ساتھ والے محلے کے واقعات میں دلچسپی نہیں رکھتے تو کائنات کے اس 50 مہاسنکھ دور موجود بلیک ہول میں بھلا ہمیں کیا خاک دلچسپی ہو گی۔ مگر خوش قسمتی سے ہماری نظر ایک دوسری خبر پر پڑ گئی۔

بعض افراد تواتر سے مطالبہ کر رہے ہیں کہ صدارتی نظام لایا جائے کیونکہ پارلیمانی نظام میں ٹکے ٹکے کے ممبر وزیراعظم کو بلیک میل کرتے ہیں اور وہ لاچار ہوتا ہے۔ اسی وجہ سے عمران خان جیسا دیانت دار، میرٹ پر چلنے والا اور دل میں قوم کا درد رکھنے والا لیڈر نہایت باشعور لیڈر بھی ناکام ہو رہا ہے۔ غالباً ان افراد کے ذہن میں امریکہ کا صدارتی نظام ہے جہاں صدر براہ راست عوام کے ووٹوں سے منتخب ہوتا ہے اور امور مملکت چلانے میں وہ کانگریس اور سینیٹ کا بہت زیادہ محتاج نہیں ہوتا۔ بہرحال امریکی صدر اتنا زیادہ با اختیار بھی نہیں ہوتا جتنا ہم سمجھے بیٹھے ہیں۔ دس جگہ اس کے منصوبوں کو کانگریس روک دیتی ہے۔

اسی وجہ سے ہماری رائے میں یہ غلط مطالبہ ہے۔ صدر اراکین پارلیمنٹ کے علاوہ ٹکے ٹکے کے ووٹر کا محتاج ہوتا ہے۔ اس لئے اگر عمران خان کو صدر بنا بھی دیا گیا تو وہ خود کو اسی طرح لاچار پائیں گے اور قوم کو وہ سنہرا زمانہ نہیں مہیا کر سکیں گے جس کی سب توقع لگائے بیٹھے ہیں۔ صدارتی نظام میں ایک بڑی خرابی یہ بھی ہے کہ صدر کو پانچ سال بعد گھر واپس بھیجا جا سکتا ہے اور دو ٹرمز کے بعد تو اس کے الیکشن لڑنے پر پابندی بھی لگ سکتی ہے۔

مورخہ 8 اپریل کو حامد میر کے پروگرام میں گفتگو کرتے ہوئے وفاقی وزیر برائے آبی وسائل فیصل واؤڈا نے بیان دیا کہ پاکستان میں نوکریوں کی ایسی بہتات ہو گی کہ امیدوار ملنا مشکل ہو جائے گا، اور یہ معجزہ محض ہفتے، دس دن، دو چار ہفتے میں برپا ہو جائے گا، اور پان چھابڑی والے بھی کہیں گے کہ آؤ ہم سے ٹیکس لے لو۔ بعض عقل و فہم سے تہی داماں لوگوں نے ان کے اس نہایت سنجیدہ بیان کا مذاق اڑانا شروع کر دیا۔ ایک تو ہماری قوم والوں کی یہ عادت بہت بری ہے کہ کسی نے آوازہ بلند کیا کہ ”پہلوان، کتا تمہارا کان لے کر دوڑا جا رہا ہے“ تو پہلے ہاتھ لگا کر اپنا کان چیک کیے بغیر ہی جی جان سے کتے کا تعاقب شروع کر دیتے ہیں۔

آگے بات بڑھانے سے پہلے یہ بات ذہن نشین کر لینی چاہیے کہ فیصل واؤڈا ایک نہایت باخبر اور متحرک وزیر ہیں۔ کراچی میں چینی قونصل خانے پر حملہ ہوا تو اپنی پچھلی جیب میں پستول رکھ کر یہ فوراً وہاں جا پہنچے اور قانون نافذ کرنے والے اداروں کی کمان سنبھال لی۔ اس وقت تک تینوں حملہ آور مر چکے تھے مگر فیصل واؤڈا کو دیکھ کر مزید حملہ آور قریب نہ پھٹکے۔

اسی طرح جب بھارتی ہواباز ونگ کمانڈر ابھینندن نے تباہ کن جنگی ساز و سامان سے لیس مگ اکیس سے پاکستان پر حملہ کیا تو وفاقی وزرا میں صرف فیصل واؤڈا ہی تھے جو اپنی پچھلی جیب میں پستول اڑس کر اس کے جہاز کا مقابلہ کرنے پہنچے اور ابھینندن کے مگ 21 کو فوٹو شوٹ کر کے اپنے قدموں تلے روند ڈالا۔ یہ صرف ان کی اساطیری بہادری کا مظہر نہیں تھا بلکہ ان کی مثالی باخبری کا شاہد بھی تھا کہ انہیں سب سے پہلے یہ خبر ملی۔

یہ اس زمانے کا ذکر ہے کہ جب ملک نیمروز پر چنگیز خان کے پوتے خاقان منگو خان کی حکومت تھی۔ منگو خان آدھی دنیا کا بادشاہ تھا مگر اس دنیا پر حکومت کرنے کے لئے اسے بے شمار گھوڑوں اور گدھوں کی ضرورت پڑتی تھی جو اس کی فوجیں اور ساز و سامان ایک جگہ سے دوسری جگہ منتقل کر سکیں۔ ظاہر ہے کہ ان گدھوں گھوڑوں کو پالنے پر خرچہ بہت آتا تھا۔ منگول اپنے گھوڑوں سے بہت محبت کیا کرتے تھے۔ ہر برس ان کے راشن میں خوب اضافہ کر دیا کرتے تھے۔ مگر گدھوں کا معاملہ مختلف تھا۔ منگولوں کی رائے میں گدھے اس قابل نہیں تھے کہ ان کو زیادہ سر چڑھایا جائے۔ اس لئے گدھوں پر کیے جانے والے مصارف انہیں بہت چبھتے تھے۔

انہی دنوں شیخ چلی ولایت سے واپس ملک نیمروز آیا۔ اس نے منگولوں کی بے چینی کو محسوس کرتے ہوئے سوچا کہ اس مسئلے کا حل اس نے نکال کر دے دیا تو خاقان منگو خان اسے کسی بڑے صوبے کا حکمران بنا دے گا۔ شیخ چلی بہت عرصے تک سوچتا رہا اور مختلف تجربات کرتا رہا۔ اسی اثنا میں ایک روز بے آب و گیاہ صحرائے گوبی کو پار کر کے اونٹوں کا ایک قافلہ ملک نیمروز پہنچا۔

تحریک انصاف کے بہت ”ڈائی ہارٹ“ حامی بھی نہایت پریشان دکھائی دے رہے ہیں۔ تحریک انصاف کی حکومت آنے کے محض چھے آٹھ ماہ بعد ہی ڈائی ہارڈ سے ڈائی ہارٹ کی تبدیلی کو بعض قنوطی پریشان کن قرار دے رہے ہیں۔ اس مردہ دلی کو پھیلانے میں مقامی اور عالمی میڈیا بھی اپنا کردار ادا کر رہا ہے۔ آج ہی روئٹر نے سٹوری شائع کی ہے کہ پنڈی کا ایک ٹیکسی ڈرائیور جس نے کپتان کی غریب پروری سے متاثر ہو کر اسے ووٹ دیا تھا اب سوچ رہا ہے کہ اپنی ٹیکسی کو آگ لگا کر نچنت ہو جائے۔

حالات نہایت مایوس کن دکھائی دے رہے ہیں لیکن گھبرانا نہیں چاہیے۔ لوگ نون لیگ کے پروپیگنڈے کا شکار ہو کر ہر اچھی چیز کو بھی بری نظر سے دیکھ رہے ہیں ورنہ ہر ذی شعور شخص یہ سمجھ سکتا ہے کہ معیشت بہتر ہو رہی ہے۔ کپتان کے بعض اقدامات عزیز ہم وطنوں کی دنیا سنوار رہے اور بعض ان کی عاقبت اور طبق روشن کر رہے ہیں۔ جناب اسد عمر بھی بتا چکے ہیں کہ مشکل وقت گزر چکا ہے اور معیشت دونوں ہاتھ پھیلا کر اٹھان لے چکی ہے۔

آج کل مارکیٹ میں خبر گرم ہے کہ عمران خان کا بوریا گول کیا جا رہا ہے۔ مختلف امکانات ظاہر کیے جا رہے ہیں۔ مثلاً پارلیمنٹ میں سے ہی کوئی ان کا متبادل بن کر ابھرے گا۔ ہو سکتا ہے کہ ان کی اپنی پارٹی کا ہو، ہو سکتا ہے کہ ان کا کوئی اتحادی ہو یا پھر ان کا مخالف۔ کبھِی شاہ محمود قریشی کا نام لیا جاتا ہے، کبھی گجرات کے چوہدریوں کا نام آتا ہے تو کبھی شہباز شریف سے ڈیل کی خبر گرم ہوتی ہے۔ لیکن کسی مقبول حکمران کو ہٹانا آسان تو نہیں ہوتا۔

حکومت آنے کے پانچ ماہ بعد جنوری میں آنے والے گیلپ کے دیسی پول تو عمران خان کی عوامی مقبولیت محض 51 فیصد بتا رہے تھے لیکن 14 مارچ کو آنے والے امریکی ادارے انٹرنیشنل ریپبلکن انسٹی ٹیوٹ کے پول تو عمران خان کی مقبولیت اس سے بھی بڑھا کر 57 فیصد بتاتے ہیں۔ جبکہ الیکشن میں انہیں کل ڈالے جانے ووٹوں کا محض 32 فیصد ملا تھا۔ طبعاً سیدھا سادہ ہونے کی وجہ سے اگر ہم ان پولز پر اعتبار کریں تو عمران خان کی مقبولیت انتخابات کے بعد دگنی ہو چکی ہے۔ پھر کیا نادیدہ قوتیں عمران خان کو ہٹا پائیں گی؟

تاریخ یہ بتاتی ہے کہ جب آپ اپنے ملک کے سرمایہ داروں اور ہنرمندوں کو ملک سے بھاگنے پر مجبور کر دیں تو آپ دوسرے ملکوں کے سرمایہ داروں اور ہنرمندوں کے آگے بھیک مانگنے پر مجبور ہو جاتے ہیں کہ وہ آپ کے وطن میں آ کر معیشت چلائیں۔

سرمایہ دار اپنے ملک کے ہوں تو ملک کا سرمایہ ملک میں رہتا ہے۔ دوسری صورت میں بیرونی سرمایہ کار سب سمیٹ کر باہر لے جاتے ہیں۔ پہلی حماقت ہم نے 1970 کی دہائی میں 22 سرمایہ دار خاندانوں کو ختم کر کے اور ہنرمندوں کو مشرق وسطی جانے پر مجبور کر کے کی تھی۔ دوسری اب کرتے دکھائی دے رہے ہیں۔

فارن انویسٹ منٹ لانے سے پہلے مقامی سرمایہ کار کو تو روکنے کی سبیل کریں جسے 1973 سے ملک سے بھاگنے ہر مجبور کیا جا رہا ہے۔ پہلے نیشنلائزیشن کے نام پر مضبوط صنعتی بنیاد کو ڈھا دیا گیا۔ اب سیاسی وابستگیوں کے نام پر کرپشن، ٹیکس، انرجی اور صنعت کی عجیب و غریب پالیسیوں، وغیرہ کے ذریعے انہیں بھگایا جا رہا ہے۔

مریم نواز شریف نے کل اپنے والد کی لیب رپورٹ ٹویٹر پر جاری کرتے ہوئے لکھا ”ابھی میاں نواز شریف سے ملاقات کے بعد واپسی ہوئی ہے۔ ان کے ڈاکٹر کی تشویش بلاوجہ نہیں تھی۔ کل کیا جانے والا بلڈ ٹیسٹ بتا رہا ہے کہ ان کے کریٹینائن لیول میں مزید اضافہ ہوا ہے جس کا مطلب ہے کہ ان کے گردوں کا فنکشن مزید خراب ہوا ہے۔ ان کے گردوں کی بیماری پہلے ہی تیسری سٹیج پر ہے۔ ان کے پہلوؤں میں مستقل درد کی شکایت ہے“۔ اس ٹویٹ کے ساتھ انہوں نے چغتائی لیب کی رپورٹ کا پورا کاغذ ٹویٹ کر دیا۔

کچھ دیر بعد سوشل میڈیا پر چغتائی لیب کی سائٹ پر موجود میاں نواز شریف کی یہ لیب رپورٹ گردش کرنے لگی۔ اس میں ایڈریس کے خانے میں نواز شریف کے پتے کی جگہ لکھا ہوا تھا کہ ”پلیز پاکستان کی لوٹی ہوئی دولت واپس کرو آزادی سے جہاں مرضی رہو۔ آداب۔ @endlessquest92۔“

ہمارا تصور تو یہ ہے کہ ترقی یافتہ ممالک میں پولیس ایمرجنسی کال کے دو تین منٹ بعد جائے واردات پر پہنچ جاتی ہے۔ اس بنیاد پر ہم نیوزی لینڈ کی پولیس پر تنقید کر رہے ہیں کہ وہ بہت زیادہ دیر میں النور مسجد پہنچی۔ کئی لوگ تو یہ کہہ رہے ہیں کہ پولیس کال موصول ہونے کے سترہ منٹ بعد النور مسجد پہنچی۔ حقیقت کیا ہے افسانہ کیا؟ اس سلسلے میں نیوزی لینڈ کے اخبارات اور ویب سائٹس، نیویارک ٹائمز اور دیگر ذرائع سے جو معلومات ملی ہیں وہ بیان کرتے ہیں۔