گزشتہ کچھ دنوں سے ہم چینی عوامی ناول پڑھ رہے ہیں۔ چاہیں تو انہیں پلپ فکشن کہیں یا پھر ویب ناول۔ ان کی کہانی دلچسپ ہوتی ہے، ریویو پھر کبھی سہی۔ بہرحال ان ناولوں کے وسیلے سے چینی رہن سہن کے علاوہ چینی محاوروں، کہاوتوں اور لوک دانش سے بھی آگاہی ملتی ہے۔ آج ہی ایک دلچسپ کہاوت پڑھی، ”جب شیر پہاڑ سے جائے تو بندر بادشاہ بن جاتا ہے“ ۔ اس کہاوت کے پیچھے موجود حکایت بھی دلچسپ ہے۔

پرانے زمانے میں ایک رواج یہ تھا کہ شہر کا بادشاہ مر جاتا تو لاٹری سکیم کے تحت نیا بادشاہ چنا جاتا۔ لاٹری سکیم کا ایک طریقہ تو یہ ہوتا کہ شہر کے سب لوگ ایک میدان میں جمع ہو جاتے اور ہما نامی کسی پرند کا انتظار کرتے۔ یہ پرند جس کے بھی سر پر بیٹھ جاتا اسے بادشاہ بنا لیتے۔ بعد میں غالباً کسی محلاتی سازش یا اندھا دھند شکار کے نتیجے میں یہ پرند ناپید ہو گیا اور آج ہمیں یہ بھی علم نہیں کہ یہ مذکر تھا یا مونث۔

بہرحال اس کے بعد بادشاہ چننے کے لیے نیا طریقہ سوچا گیا۔ اب بادشاہ مرتا تو سب لوگ شہر کا دروازہ بند کر کے بیٹھ جاتے۔ اگلی صبح جو شخص بھی سب سے پہلے شہر میں داخل ہوتا اسے بادشاہ بنا دیتے۔

یہ تحقیق نہیں ہو پایا کہ شہر والے احساس کمتری میں مبتلا تھے اور امپورٹڈ سامان کے علاوہ امپورٹڈ حکمران کو بھی ترجیح دینے لگے تھے یا پھر وہ اس حد تک ایک دوسرے کے کردار سے واقف تھے کہ کہتے تھے کہ ان سب سے بہتر ہے کہ باہر سے کوئی حکمران آ جائے خواہ وہ شیطان ہی کیوں نہ ہو۔ بہرحال جو بھی وجہ ہو، ہونے یہ لگا کہ کبھی تو کوئی جلاوطن شہزادہ اس شہر کا حکمران بن جاتا، کبھی کوئی سوداگر، اور کبھی کوئی عالمی مہاجنوں کا کارندہ۔

خاندانی کاروباری افراد کہتے ہیں کہ نوکری میں کچھ نہیں رکھا کاروبار کرو۔ اپنے بچوں کو میٹرک ایف اے تک پڑھاؤ اور اپنی چوکی پر بٹھا دو۔ پھر اپنا تعلیم کا شوق پورا کر لو اور جتنا جی چاہے اتنے اعلیٰ تعلیم یافتہ افراد کو اپنا ملازم رکھ لو۔ دوسری طرف خاندانی ملازم لوگ کہتے ہیں کہ کاروبار نرا گھاٹے کا سودا ہے، کوئی پتہ نہیں کب آسمان پر جگمگانے والا تارا ایک سودے میں ہی سڑک پر آ جائے۔ کاروباری افراد ہر روز نیا کنواں کھودتے ہیں تاکہ اس دن کے پانی کا بندوبست ہو جبکہ نوکری کرو تو نری بے فکری ہے، پکی ماہانہ آمدنی لگ جاتی ہے۔